Mu pari tia lundi 10 octobre 2022, bingundu bia nsi ya Russie biamwangase mahata mamingi ma ku Ukraine, ha manima ma bingundu biamwangase tiamvu tie ha kati dia tizunga tia Crimée na nsi ya Russie. Misamu mio miatumini mfumu za politike mu lwengesa bantu mu bungu dia Armagedo.

•   “Ka tubanzaka ko ti Armagedo yatûla tûka ntangu ya [John F. Kennedy na musamu wa bingundu bia ku Cuba. [. . .] Mbenzi ti tamana sarila bombes atomiques, Armagedo mbo yitulumuka.”​—Joe Biden, mfumu ya luyâlu ku États-Unis, 6 octobre 2022.

•   “Armagedo yilendi tulumuka, musamu wa mpasi wena mu bungu dia nza yayansoni.”​—Volodymyr Zelensky, mfumu ya luyâlu ku Ukraine, bu bamuyuriri misamu milendi tulumuka mu nsalulu ya bombes atomiques, BBC News, 8 octobre 8, 2022.

 Ngano nsalulu ya bombes atomiques yilendi tulumuna muzingu wa Armagedo? Bibila bwe ditâka?

 Kâni. Ntêlo ya “Armagedo” mbala mosi kwa yena mu Bibila, mu Nzabukusu 16:16. Ka wena muzingu ha kati dia makanda ko, kâ muzingu wena ha kati dia Nzambi na “mitinu mia mutoto wawansoni.” (Nzabukusu 16:14) Nzambi mbo kasarila muzingu wa Armagedo mu sukisa bimfumu bia bantu.​—Daniele 2:44.

 Mu tomo zaba bwe Armagedo yizolo tâ mu bungu dia mutoto, tanga mutu diambu wa Ngano muzingu wa Armagedo ni nti?

 Kâni. Ni bu sa ti mfumu za nza zilendi sarila bombes atomiques mu bilumbu bita kwiza, Nzambi ka bika ko ti mutoto wamwangana. Bibila ditêle:

•   “Mutoto mankululu wuzinga.”​—Ekleziaste 1:4.

•   “Bantu ba sungama mbo babiarila mutoto, mpe mbo bazinga mankululu ha zulu mutoto.”​—Mikunga 37:29.

 Kâ, mbikululu za Bibila na misamu mia bwawu bu, bisongele ti ntamana nsobolo zikwiza mu bungu dia bantu. (Matie 24:3-7; 2 Timote 3:1-5) Dzukula misamu mitâka Bibila mu bungu dia bilumbu bita kwiza, mu nzila ya ndongokolo’eto ya Bibila.