Mundi, octubre kati yua 10 mani 2022 titan ra, Rusia kuntrika ba Ucrania kuntrika tawanka kum kum ra bum nani lulkan. Yu wâl kaina ra, naha ba Crimea wihki Rusia wal bilkara briks kum ra bum lulki muni sauhkan ba tâwan, pana munaia lukanka wal daukan. Piua wiria kum kaina ra, pulitik uplika kum kum pat maisa pakan kan, ban wina Armagedan tâ krikbia.

•   “[Stech kuntrika prisidintka] Kennedy iwi kan piua wina, bara Cuba kuntrika wal bum saura nani yus muni war aiklabanka kum tâ krikai kan piua wina, naiwa Armagedan ba kau wan lamara takan sa. [...] Bum saura nani ba Armagedan kau dimras ba ra yus munbia sapa nu âpu sna” (Joe Biden, Stech kuntrika prisidintka, octubre kati yua 6, 2022).

•   “Yang sin kasak lukisna naha ba Armagedan sa. Tasba aiska ra sringka kum sa” (Ucrania prisidintka Volodímir Zelenski ra bum saura nani yus munbia dukiara makabi walan taim, witin baku aisan; BBC News, octubre kati yua 8, 2022).

 ¿Bum saura nani lulki, Armagedan tâ krikaia sip sa ki? ¿Baibil ba dîa wisa?

 Apia. Baibil ra Armagedan bîla ba aima kumi takisa, baha ba Param Marikan 16:16 ra. Bâra tânka marikisa naha ba nisan nani tilara war aiklabanka kum apia sa, kau ni naha ba Gâd bara “tasba aiska kingka nani” wal war aiklabanka kum sa (Param Marikan 16:14). Gâd ba Armagedan warka yus muni, naha tasba gabamintka nani sut âpu daukbia (Daniel 2:44).

 Armagedan ra dîa takbia ba lan takaia want sma kaka, “¿Qué es el Armagedón?” ulbanka ba aisi kaiks.

 Apia. Kaina piua ra gabamint nani ba bum saura nani yus munbia kra sin, Gâd ba naha Tasba sauhki tikbia swiras sa. Baibil ba naku wisa:

•   “Tasba ba, aihka takras ban bâra sa” (Smasmalkra 1:4).

•   “Kasakkira nani ba lika tasbaya ba bri iwbia, ban kaia ra sin baha tasbaya ra iwi kabia” (Lawana Nani 37:29).

 Ban sakuna, Baibil prapit aisanka nani ba naiwa piua ra dîa takbia ba marikisa, bara baha wiaia want sa, yawan sut ba las tnata yua saura ra iwisa (Matiu 24:3-7; 2 Timoti 3:1-5). Kaina piua dukiara Baibil dîa wi ba, wan Baibil stadika mana luha wal nu takaia sip sma.