E Vukei Keda Vakacava na iVolatabu Meda Yalorawarawa?

SARAVA/ROGOCA

“Ena vinaka na bula veimaliwai ke da dau yalorawarawa.”—UNESCO Declaration of Principles on Tolerance, 1995.

Ia na veivakaduiduitaki e rawa ni vakavuna meda veicati qai sega ni veidokai. Qori e rawa ni vakavuna na vosa vakacaca, veivakaduiduitaki kei na itovo kaukaua.

E levu e duidui nodra rai me baleta na yalorawarawa. Eso era nanuma ni o ira na yalorawarawa e dodonu mera taleitaka na itovo kece, kei na ka era cakava eso tale. Eso tale era duavata kei na ka e kaya na iVolatabu, ya ni dodonu me dokai nona dodonu e dua me digia na itovo, kei na ka e vakabauta ke sega mada ga ni taleitaki.

E yaga vakacava na iVolatabu meda rawa ni vakaraitaka na yalorawarawa ena gauna qo?

Yavu vakaivolatabu ni yalorawarawa

E uqeti keda na iVolatabu meda dau yalorawarawa. E kaya: “Me kilai na nomuni yalorawarawa vei ira na tamata kece ga.” (Filipai 4:5) E uqeti keda tale ga meda dauveinanumi, veirokovi, da qai cakava na ka e dodonu. O ira na muria na ivakaro qori era na rairai sega ni duavata se muria na ka e vakabibitaka e dua, era na sega ga ni tarova me cakava na ka e vinakata.

Ia e vakaraitaka na iVolatabu na ivakatagedegede ni Kalou me baleta na noda ivalavala. E kaya: “[Na Kalou] sa tukuna oti vei iko, na tamata, na ka vinaka.” (Maika 6:8) E dusimaki keda gona o koya me rawa nida marautaka na bula vinaka duadua.—Aisea 48:17, 18.

Na Kalou e sega ni solia vei keda na dodonu meda vakalewai ira eso tale. E kaya na iVolatabu: “E dua ga e Vunilawa e Turaganilewa tale ga . . . O cei o iko mo vakalewa na kainomu?” (Jemesa 4:12) Na Kalou e solia vei keda yadua na galala meda digia na ka meda cakava vakataki keda.—Lako Yani 30:19.

Ka e kaya na iVolatabu me baleta na yalorawarawa

E kaya na iVolatabu ni dodonu meda “rokova na tamata kece.” (1 Pita 2:17, New Jerusalem Bible) O ira gona era digia mera muria na ivakatagedegede vakaivolatabu era na dokai ira kece na tamata, ke duidui mada ga na ka era vakabauta kei na nodra ivakarau ni bula. (Luke 6:31) E sega ni kena ibalebale ya nira na duavata ena ka era vakabauta kei na nodra rai, se mera tokona na nodra vakatulewa. Era na sega ni veibeci, ia era na saga nodra vinaka kece mera vakatotomuri Jisu ena ka e cakava vei ira eso tale.

Kena ivakaraitaki, a sotava o Jisu e dua na marama e lewena na lotu e sega ni taleitaka na kena ivakavuvuli. Na marama tale ga qo e tiko vata kei na dua na tagane e sega ni watina. E sega ni vakadonuya o Jisu na ivalavala qori, ia e vosa tiko ga vua ena veidokai.—Joni 4:9, 17-24.

Me vakataki Jisu, era tu vakarau na lotu vaKarisito mera vakamacalataka nodra vakabauta vei ira na via rogoca. Ia era cakava qori ena “veidokai dina.” (1 Pita 3:15) Na iVolatabu tale ga e vakaroti ira mera kua ni usuraka nodra rai vei ira tale eso. E kaya ni o ira na imuri i Karisito “e sega ni dodonu me veivala. . .me yalomalua ga vei ira kece,” okati kina o ira e duidui nodra vakabauta.—2 Timoci 2:24.

Ka e kaya na iVolatabu me baleta na veicati

E kaya na iVolatabu meda ‘saga na veiyaloni kei ira na tamata kece.’ (Iperiu 12:14) O koya e saga na vakacegu e sega ni dau veicati. Dina ni na sega ni cakava e dua na ka me beci kina na ka e vakabauta, ia ena saga tiko ga nona vinaka kece me veiyaloni kei ira eso tale. (Maciu 5:9) Na iVolatabu tale ga e uqeti ira na lotu vaKarisito mera lomani ira na kedra meca nira caka vinaka tiko ga vei ira.—Maciu 5:44.

E macala ga ni kaya na iVolatabu ni “cata,” se “sevaka,” na Kalou na itovo lolovira, se vaka vu leqa vei ira eso tale. (Vosa Vakaibalebale 6:16-19) Ia na iVolatabu e vakayagataka na vosa “cata,” me vakaibalebaletaka na noda sega ni taleitaka na itovo ca. E kaya na iVolatabu ni tu vakarau na Kalou me veivosoti, me vukei ira tale ga era vinakata mera muria nona ivakatagedegede.—Aisea 55:7.

Tikinivolatabu e vakamacalataka na yalorawarawa kei na veidokai

Taito 3:2: ‘Mo yalorawarawa, qai yalomalua vei ira kece na tamata.’

O koya e yalorawarawa ena rogoca na duidui rai ena sala malumu, qai uqeta tiko ga na veidokai.

Maciu 7:12: “Na ka kece dou vinakata mera cakava vei kemudou na tamata, dou cakava tale ga vei ira.”

Eda dau vakavinavinakataka nira dokai keda eso tale, era kauaitaka tale ga noda rai kei na ivakarau ni lomada. Mo kila eso tale na ivakarau e vakavulica o Jisu me muri, raica na ulutaga “Na Cava na Vunau Koula?”

Josua 24:15: “Digia nikua o koya oni na qarava.”

Eda sa uqeta tiko na veiyaloni nida doka nodra dodonu ni vakatulewa eso tale.

Cakacaka 10:34: “Sega ni dau veivakaduiduitaki na Kalou.”

Na Kalou e sega ni vakaduiduitaka e dua ena nona itovo, tagane se yalewa, vanua e cavutu mai kina, matatamata e lewena, se nona isususu. O ira na via vakatotomuria na Kalou era na doka na tamata kece.

Apakuki 1:12, 13: “[Na Kalou] e sega ni vosota na ivakarau ca.”

E vakaiyalayala nona vosovoso na Kalou. Ena sega ni vakalaivi ira na tamata ca mera cakava tiko ga na veika ca. Mo kila eso tale na ka, sarava na vidio Na Cava e Vakatara Tiko Kina na Kalou na Rarawa?

Roma 12:19: “Laiva ga me qai sauma na Kalou, ni volai: ‘E noqu na veisausaumi, au na sauma,’ e kaya o Jiova.” a

Na Kalou o Jiova e sega ni vakarota meda veisausaumitaka na ca. Ena vakadeitaka me tau vakadodonu na lewa ena kena gauna lokuci. Mo kila eso tale na ka, wilika na ulutaga “Ena Rawati e Vuravura na Lewadodonu?”

a Na yaca ni Kalou o Jiova. (Same 83:18) Raica na ulutaga “O Cei o Jiova?”

Vakacava o ira na iVakadinadina i Jiova era dau yalorawarawa vei ira eso tale ra qai doka na nodra lotu?

Eso era nanuma ni neimami cakacaka vakavunau e vakaraitaka ni keimami vakaduiduitaka na nodra vakabauta eso tale. Ia keimami doka na nodra dodonu ni vakabauta. Keimami sega tale ga ni usuraka neimami rai vei ira eso tale. Mo kila na vuna keimami lai vosa kina vei ira sa tiko rawa nodra lotu, wilika na ulutaga “Vakacava Keimami Vakasaurarataki Ira Eso Tale Mera Veisautaka Nodra Lotu?”

Keimami sega ni vakasaurarataka e dua me mai iVakadinadina i Jiova, se me lewena tiko ga na lotu qo. Keimami doka ke dua e via kere vakacegu me kua ni iVakadinadina i Jiova. Ia era na rairai vaqaqa eso, ‘Ke ra doka na iVakadinadina i Jiova nodra vakabauta eso tale, cava ga na vuna era vakasivoya se vakanadakui ira na dau sokalou vata tu?’ (1 Korinica 5:11, 13) Mo kila eso tale na ka, wilika na ulutaga “Era Sega ni Dau Veimaliwai Kei Ira na Lewenilotu e Liu na iVakadinadina i Jiova?”