I cabit mogo ma lubo-ni, kibibolo kwir i lobe mapol. Dano gitye ka moko tamgi i kom latela mene ma gubiyero.

 Gin ango ma Baibul waco?

 Baibul nyuto ni tye jami mogo ma lutela ducu ma i lobo-ni pe gitwero cobone.

•   “Pe ibed ka geno rwodi, pe igen dano adana mamwa ma pe romo konyi-ni. Ka oto dok i ngom ka ma yam oa ki iye; yubbe ducu ma yam oyubo rwenyo woko liweng i nino meno kikome.”—Jabuli 146:3, 4.

 Kadi wa latela ma pud dong ber loyo wang ma oto. Medo i kom meno, pe tye yo mo ma lutela gitwero mokone ni jo ma bileyo ka-tyengi bimedde ki tiyo tic mabeco ma gin gucako.—Latitlok 2:18, 19.

 Baibul nyuto ni pe kicweyo dano me loyo luwotgi.

•   “Pe tye ngat mo ma tye ki twero me loyo kwone.”—Jeremia 10:23.

 Tika tye latela mo maber loyo i kare-ni?

 Baibul waco ni Lubanga ocimo latela ma genne adada: Yecu Kricito. (Jabuli 2:6) Yecu aye Kabaka me Ker pa Lubanga, nyo gamente ma loyo ki i polo.—Matayo 6:10.

 Tika ibiyero me mine i te tela pa Yecu? Baibul nyuto gin mumiyo lapeny man pire tek:

•   “Wurum congwu i nyime [Yecu Kricito]; wek kiniga pe omake i komwu, miyo wuto woko i yo; pien akemo make oyotoyot mada. Gitye ki gum jo ducu ma giringo gilaro bote.”—Jabuli 2:12.

 Man aye kare me moko tammi. Lok pa lunebi me Baibul nyuto ni Yecu ocako loc i mwaka 1914 dok cokcok-ki Ker pa Lubanga bileyo kaka gamente ducu.—Daniel 2:44.

 Me niang kit ma itwero cwako kwede loc pa Yecu, kwan pwony ma wiye tye ni “Mok Tammi me Cwako Ker pa Lubanga Kombeddi!”