Nihi ngɛ a yi mi kpɔ mwɔe ngɛ nɔ nɛ a maa hla konɛ e nyɛɛ a hɛ mi ɔ he.

 Mɛni Baiblo ɔ de?

 Baiblo ɔ tsɔɔ nɔ́ nɛ adesa nɔ yeli tsuo be nyɛe maa pee.

•   “Nyɛ ko ngɔ nyɛ hɛ kɛ fɔ ganɔ ko, loo nɔmlɔ adesa ko nɔ, ejakaa e be he wami nɛ e ma he nyɛ yi wami. Ke nɔmlɔ gbo ɔ, e kpaleɔ kɛ yaa zu mi ekohu, jamɛ a ligbi ɔ nɔuu e yi mi tomi ɔmɛ tsuo a se poɔ.”​—La 146:3, 4

 Ma hɛ mi nyɛɛli nɛ a bɔɔ a he mɔde wawɛɛ po ma nyɛ ma gbo ligbi ko. Nɛ jehanɛ se hu ɔ, a be nyɛe ma ha nɛ nihi nɛ a ma ba ye nɔ ngɛ a se ɔ, nɛ́ a tsa ní tsumi kpakpa nɛ a tsu ɔ nɔ.​—Fiɛlɔ 2:18, 19.

 Anɔkuale sane ji kaa, Baiblo ɔ ha nɛ wa le kaa a bɔɛ adesahi kaa a ye mɛ nitsɛmɛ a nɔ kɔkɔɔkɔ.

•   “Pi nɔmlɔ adesa nitsɛ he wami nya ji kaa e maa pee kikɛ nɛ ɔ, loo kikɛ nɛ ɔ.”​—Yeremia 10:23.

 Anɛ nɔ ko ngɛ wa be nɛ ɔ mi nɛ́ e ma nyɛ ma pee hɛ mi nyɛɛlɔ kpakpa lo?

 Baiblo ɔ tsɔɔ kaa Mawu hla hɛ mi nyɛɛlɔ kpakpa nɛ́ e se be nɛ́ wa ma nyɛ ma he lɛ maa ye, nɛ lɛ ji, Yesu Kristo. (La 2:6) Yesu ji Mawu Matsɛ Yemi ɔ nɛ́ ji nɔ yemi nɛ e ngɛ nɔ yee ngɛ hiɔwe ɔ nya Matsɛ.​—Mateo 6:10.

 Anɛ o maa hla kaa o maa kplɛɛ Yesu nɛ ji hɛ mi nyɛɛlɔ nɛ Mawu hla a nɔ lo? Baiblo ɔ tsɔɔ nɔ́ he je nɛ sane bimi nɛ ɔ he hia a:

•   ‘Nyɛ he nɛ do blibliibli, nɛ nyɛ kpla si ngɛ [Yesu Kristo] hɛ mi. Ke pi jã a, [Mawu] mi mi ma fu nyɛ si kake too, nɛ nyɛ hɛ mi ma kpata. Nihi tsuo nɛ ba saa we ngɛ Yehowa ngɔ ɔ ma na bua jɔmi.’​—La 2:12.

 Amlɔ nɛ ɔ ji be nɛ e sa kaa o mwɔ o yi mi kpɔ. Baiblo gbami tsɔɔ kaa, Yesu bɔni nɔ yemi ngɛ jeha 1914, nɛ e be kɛe nɛ Mawu Matsɛ Yemi ɔ ma kpata adesahi a nɔ yemihi tsuo a hɛ mi, nɛ nɔ yemi nɛ ɔ ma ba da adesa nɔ yemihi a nane mi.​—Daniel 2:44.

 Ke o suɔ nɛ o kase babauu kɛ kɔ bɔ nɛ o ma plɛ kɛ fĩ Yesu nɛ ji hɛ mi nyɛɛlɔ nɛ Mawu hla a se ɔ, moo kane munyu nɛ ji “Mo Fĩ Mawu Matsɛ Yemi ɔ Se Piɔ!”