Le kwɛshila ɖewo mɛ yɛɔ, wojikɔ ada akɔ le jukɔn vovovowo mɛ le xexeɛ mɛ. Amɛwo sɔkɔ gbeta veviwo so jukplɔtɔ ciwo woada akɔ nɔ nu.

 Enyɔ ci Bibla nu so nuɔ?

 Bibla nu sɛnxu ɖeka ci yí le jukplɔtɔ ciwo pleŋ yí nyi agbetɔwo shi.

•   “Mí ŋgbe godo míwo kplɔtɔ nu nɔ alɔ̀du byɔbyɔ o. Mí ŋgbe doji do amɛwo nu o. Nyi taɖo ɔ? Amɛwo da tɛnŋ hwlɛn mí gan o. Amɛwo ku yí wo ɖyi wo. Eyi, totomɛ ciwo yí wo wa nɔ alɔ̀du so yì.”—Ehajiji Wema 146:3, 4.

 Jukplɔtɔ ciwo yí jenɔ agbla nywiɖe can avaku. Gbesɔ kpe niɔ, wodatɛnŋ atekpɔ nɔ mɛbuwo avakplɔ jukɔn lɔ nywiɖe shigbe wowo hannɛ le wowo ku godu o.—Ŋununyatɔ 2:18, 19.

 Nyɔnɔnwi lɔ yí nyi mɔ, Bibla dasɛ mɔ agbetɔwo datɛnŋ akpa cɛ nɔ wowoɖekiwo gbeɖe o, ɖo wodewa wo do ahan tɔ ji o.

•   “Ŋsɛn dele agbetɔ shi yí akplɔ yiɖeki o.”—Ʒeremi 10:23, NWT.

 Mɛɖe li yí atɛnŋ anyi jukplɔtɔ nywitɔ le egbɛ mɛa?

 Bibla nu mɔ Mawu ɖo jukplɔtɔ nywitɔ ɖeka ci nu kankandoji le: Eyi nyi Yesu Kristo. (Ehajiji Wema 2:6) Yesu yí nyi Fyɔ nɔ Mawu Fyɔɖuxu lɔ ci yí akpa acɛ so jeŋkwi mɛ.—Matie 6:10.

 Àlɔn axɔ Yesu cɛkpakpaa? Bibla dasɛ enu ci yí taɖo cancan cɛ le veviɖe:

•   “Mí dasɛ mɔ mí do ji do Mawu Vi [Yesu Kristo] nu. Nɔ́ mí de wa ahan ɔ, Á do dɔmɛzi yi a trɔn mí. Amɛ ciwo yí kando Tɔhonɔ ji le jijɔ mɛ.”—Ehajiji Wema 2:12.

 Kakacɛ yí èɖo asɔ gbeta ke. Bibla nyɔnuɖɛwo dasɛ mɔ Yesu tɔ acɛ kpakpa le exwe 1914 yí dajinjin o, Mawu Fyɔɖuxu lɔ aɖɔli agbetɔwo cɛkpakpawo pleŋ.—Daniɛli 2:44.

 Nɔ àkpɔ nubuwo so lé àwɛ anɔ godu nɔ Yesu cɛkpakpa nuɔ, hlɛn nyɔci ci yí nyi “Tiae Be Yeade Mawu Fiaɖuƒea Dzi Fifia!”