I kinde yenga ma bibino ceng’ini eni, bolo kwir bikadhu i ng’om ma tung’ tung’ i wang’ ng’om zoo. Dhanu gibemaku yub ma pire tek mi ng’iyo ju ma bibedo jutela migi.

 Biblia ke uyero ang’o?

 Biblia unyutho kamaleng’ nia jutela ceke ma dhanu gitie ku copo m’utie kud ajikine.

•   “Kud igen judongomawijo, kadi wod dhanu, ma kony umbe bang’e. Yuyo pare wok, man edok ba ng’om pare; i ceng’ maeni nini pidoic pare rwinyo.”​—Zaburi 146:3, 4.

 Kadok jutela ma gibenen nia gitie ber nisagu zoo de, pare kokoro gibitho. M’umedo maeno, gimbe ku copo mi ketho tic ma beco ma gitimo umedere asu nitimere i the tela mi ju ma bidobimo i ng’eygi.​—Eklizia 2:18, 19.

 Thelembe ma ngbeng’ utie nia, Biblia unyutho nia dhanu jucwiyo ngo nia gibim wigi gigi.

•   “Yo mi dhanu en e i ie gire ngo; telo wi dakutielo pare mbe ba dhanu ma wotho.”​—Yeremia 10:23.

 Nyo ng’atu moko nuti ma copo telo wi dhanu cuu tini?

 Biblia ukoro nia, Mungu ung’iyo jatelo moko ma jugeno man m’utie ku copo ma lee: En e Yesu Kristu. (Zaburi 2:6) Yesu utie Ubimo mi Ker pa Mungu, man ebibimo iwi ng’om niai kud i polo.​—Matayo 6:10.

 Nyo ibing’iyo Yesu re m’ubed jatela peri? Biblia unyutho thelembe m’uketho penji maeno pire tie tek:

•   “Wucwi limb wod [niwacu Yesu Kristu], ng’ecwiny umaru nege, man wunyothru i yo, kum kwinyo pare dhingo opo. Mugisa ni dhanu ceke m’upondo i bang’e.”​—Zaburi 2:12.

 Kawoni re m’utie saa m’umito itim iye ng’iyong’ic peri. Lembila mi Biblia unyutho nia Yesu ucaku bebimo iwi Ker pa Mungu niai i oro 1914, man ceng’ini eni Kerne bikabu bimobim ceke mi dhanu.​—Daniel 2:44.

 Pi ning’eyo ayi m’icopo diko ko cingi i kum telowic pa Yesu, som thiwiwec “Choisissez de soutenir le royaume de Dieu dès maintenant !”