Ol man oli stap mekem impoten desisen long saed blong lida we bambae oli jusum.

 ?Baebol i talem wanem?

 Baebol i soemaot from wanem ol lida blong wol oli no naf blong mekem evri samting.

•   “Yufala i no mas trastem ol prins no wan pikinini blong man. Olgeta oli no save mekem wan samting blong sevem man. Taem win blong hem i goaot, hem i gobak long graon, long sem dei ya, ol tingting blong hem oli finis.”—Ol Sam 146:3, 4, futnot.

 Nating se i gat sam gudfala lida, be olgeta tu bambae oli ded. Antap long hemia, oli no save promes se ol man we oli kam biaen long olgeta, bambae oli gohed long gudfala wok we oli stap mekem.—Prija 2:18, 19.

 Blong talem stret, Baebol i soemaot se God i no wokem man blong i rulum ol man bakegen.

•   “Man we i stap wokbaot, hem tu i no naf blong lidim step blong hem.”—Jeremaea 10:23.

 ?Olsem wanem? ?I gat wan gudfala lida long taem blong yumi?

 Baebol i talem se God i putumap finis Jisas Kraes, olsem Lida we i rul gud mo yumi save trastem hem. (Ol Sam 2:6) Jisas i King blong Kingdom blong God, hemia wan gavman we i stap long heven.—Matiu 6:10.

 ?Bambae yu yu jusum Jisas olsem Lida blong yu? Baebol i soemaot from wanem kwestin ya i impoten tumas:

•   “Yufala i ona long pikinini ya [Jisas Kraes], sipos no, God bambae i kros, nao bambae yufala i lus nomo long rod ya, from we kros blong Hem i olsem faea we i laet kwiktaem nomo. Olgeta we oli glad, hemia olgeta we oli stap go long Hem blong haed.”—Ol Sam 2:12.

 Naoia i stret taem blong mekem desisen blong yu. Profet tok blong Baebol i soemaot se Jisas i statem rul blong hem long yia 1914, mo se i no longtaem, Kingdom blong God bambae i tekem ples blong ol gavman long wol.—Daniel 2:44.

 Blong kasemsave moa olsem wanem blong sapotem rul blong Jisas olsem Lida blong yu, ridim atikol ya “!Tekem Saed Blong Kingdom Naoia!”