Besondô ba zu, abui bôte ya abui mesi da ya wua vote, mfa’a tobe môte a ye bo ntebe ôsu wop. Nya ajôô a ne na, e nyoñe nty’ane ya tobe ntebe ôsu a nji ve’ele bo fianga jam.

 Jé Bible a jô?

 Bible a liti jame betebe ôsu ya émo ji be vo’o kui na be bo.

•   “Te tabe bone bejô bôt mebun, Nge mone môt, nnye ate mvolan ô nji bo be nye. Mvebe wé w ’akôlô, a bulane mete ’e mé; Môs ôte ôbien minsimesane mié mi ajañ.”​—Besam 146:3,  4.

 To’o ntebe ôsu ate a bili mbamba mefulu mese, ve a ye su’ulane wu. Nde fe, teke jame éziñ da liti na, môt é nyoñe éto mvuse awu dé, é ke ôsu a bo ésaé a nga taté je.​—Ecclésiaste 2:18, 19.

 Jôme te nje Bible a kôme liti na, é nji ve’ele veban be môte binam na a jôé émien.

•   “Zene môt é nji bo be émien; ñyeman ô nji bo nleme môt été, ane a ye wulu zene jé”​—Jérémie 10:23

 Ye bi ne fo’o bi nya njôô bi ne kôme tabe nnye ndi?

 Bible a ye’ele na, Zambe a teléya nya ntebe ôsuu a yian a nyu bi ne kôme tabe nnye ndi, nnye ate a ne Yésus Krist. (Besam 2:6) Yésus a ne Njôô ya Éjôé Zambe, Éjôé éte é ntele yôp été.​—Matthieu 6:10.

 Ye wo yé fo’o kañese na Yésus nnye abo Njôô wôé? Bible a liti amu jé é ne mvaé ya tobe Yésus ane Njôô:

•   “Lata’ane mo anyu, a za yaa, a mi za jañe zene yôp, Amu ayaa dé é nga ye ji’a yôñ. Ébotan a ba bese ba sobô be nye.”​—Besam 2:12.

 Awolo ya nyoñe nty’an; nje di. Nkulan ajô ya Bible wo liti na, Yésus a nga taté na a jôé mbu 1914 a na, ana’ana, Éjôé Zambe ja ye mane tyame bijôé bivo’o bise ya si.​—Daniel 2:44.

 Asu na ô yeme jame ô ne bo ndemben ô tebe ngame Yésus, lañe’e nlô ajô ô ne na: “Nyoñe’e ntyi’ane ya su’u Éjôé Zambe ataté den!”