Ta hace importante decision el maga gente acerca si con quien sila iscuji como lider.

 Cosa el Biblia ta habla acerca con este?

 El Biblia ta menciona si porque limitao lang el cosa puede hace el maga gente.

•   “No ustedes confia con el maga principe ni con el anak del gente quien gendeh puede dale salvacion. Ta sale el de suyu resuello, ta bira le na tierra; na ese mismo dia, ta perde el de suyu pensamiento.”—Salmo 146:3, 4, footnote.

 Maskin el maga bien bueno lider hay muri siempre na uliji. Mas pa, nuay garantia que aquellos quien man sunod kanila hay continua con el diila maga buen trabajo.—Eclesiastes 2:18, 19.

 Ta revela el Biblia el verdad que nuay gayot diseña con el maga gente para rula con el diila mismo cuerpo.

•   “Gendeh para na gente que guia maskin el de suyu paso.”—Jeremias 10:23.

 Tiene ba quien puede queda un buen lider na diaton tiempo ahora?

 El Biblia ya explica que el Dios ya iscuji un lider que de con todo bueno y puede gayot kita confia: si Jesucristo. (Salmo 2:6) Si Jesus amo el Rey na Reino del Dios, un gobierno que ta rula estaba na cielo.—Mateo 6:10.

 Hay iscuji ba tu con Jesus como lider? El Biblia ta dale mira si porque importante ese decision:

•   “Honra con el anak [si Jesucristo], para gendeh rabia el Dios y destroza con ustedes, cay el De Suyu rabia enseguidas ta arde. Alegre el todo aquellos quien ta hace refugio con Ele.”—Salmo 2:12.

 Ahora ya el tiempo para hace tu de tuyu decision. El maga profecia na Biblia ta dale mira que ya principia ya si Jesus rula del año 1914 y gendeh dura, el Reino del Dios hay cambia con el todo gobierno del gente.—Daniel 2:44.

 Para sabe pa mas acerca si paquemodo tu puede suporta con el rulanza de Jesus, le con el articulo “Choose to Support God’s Kingdom Now!”