A ra laimi zarh tlawmpal ah vawleicung pumpi ram tampi ah thimfung thlaknak a um lai. Mi nih zei bantuk hruaitu dah kan i thim lai timi a biapimi biakhiahnak kha an tuah.

 Baibal nih zeidah a chim?

 Minung hruaitu dihlak nih ri an ngeihmi kong kha Baibal nih a langhter.

•   “Bawi kha i bochan hna hlah u, nanmah aan khamh kho ṭung hna lomi kha i bochan hna hlah u. An thih tikah leidip ah an kir ko; cu ni ah cun an khuakhannak vialte cu an dong fawn ko.”—Salm 146:3, 4.

 Thil tampi a tuah khomi hruaitu hna hmanh a donghnak ah an thi. Mah lengah thilṭha an tuahmi zong anmah an rian a changtu hna nih pehzulh in an ṭuan lai ti kha aamah an khang kho lo.—Phungchimtu 2:18, 19.

 Zeicahtiah minung cu zeitikhmanh ah anmah tein an i uk kho lai lo tiah Baibal nih a langhter caah a si.

•   “A nunchung i a kalnak lam zong hi amah nih aa ser khawhmi an si lo.”—Jeremiah 10:23.

 Atu kan chan ah hruaitu ṭha a si khomi pakhatkhat an um maw?

 Pathian nih a ṭha bikmi le bochan awk a tlak bikmi hruaitu in Jesuh Khrih kha rian a pek tiah Baibal nih a ti. (Salm 2:6) Jesuh cu vancung cozah, Pathian Pennak Siangpahrang a si.—Matthai 6:10.

 Jesuh kha hruaitu in na cohlang lai maw? Baibal nih mah biahalnak cu zeicah a biapit tuk ti kha a langhter:

•   “A hmai ah kun tuah u. Cuti a si lo ahcun, a thinhunnak kha khulrang in a alhmi a si caah, a thin a hung lai i nan thi sual lai. Amah tangah aa dormi cu thluachuakmi an si.”—Salm 2:12.

 Atu hi biakhiahnak tuah caan a si cang. 1914 ah Jesuh cu Siangpahrang a ṭuan i a rauhhlan ah minung cozah vialte kha Pathian Pennak in a airolh lai ti kha Baibal chimchungbia nih a langhter.—Daniel 2:44.

 Hruaitu pakhat in Jesuh cohlan khawh ning kong tam deuh in hngalh awkah “Atu Ah Pathian Pennak Bawmh Dingin I Thim” timi capar kha rel.