Adapɛn kakra a ɔda hɛn enyim no, wɔbɔtow aba wɔ aman ahorow pii do. Nyimpa piinara rodwen obi a wɔbɔtow ama no ma wɔaabɛyɛ hɔn kandzifo no ho.

 Ebɛn asɛm na Bible no ka fa iyi ho?

 Bible no ma yehu asɛm bi a obotum ato aban mpanyimfo nyinara.

•   “Mma hom mmfa hom werɛ nnhyɛ ahemfo mu, anaa ɔdasanyi ne ba a mboa bi nnyi no mu no mu. N’ahom fir edzi kɔ, ɔsan kɔ ne dɛtse mu; da no ara na ne tsirmu nsɛm ahera.”​—Ndwom 146:3, 4.

 Sɛ ɔkandzifo bi bɔ noho mbɔdzen dɛn ara mpo a, mbrɛ ɔtse biara da kor obowu. Nkyii so, sɛ ɔyɛ ndzɛmba papa mpo a, biribiara nnkyerɛ dɛ obi a ɔbɛba abɛhyɛ n’ananmu no bɔtoa ndwuma pa a ɔyɛe no do.​—Ɔsɛnkafo 2:18, 19.

 Asɛm no ara nye dɛ, Bible no ma yehu dɛ Nyankopɔn ammbɔ nyimpa da dɛ ondzi ne nyɛnko nyimpa do tum.

•   “Onnyi ɔdasanyi a ɔnam ne nsamu mbrɛ obodua etutu n’anamɔn.”​—Jeremiah 10:23.

 Aso yebotum enya obi a obotum edzi nyimpa do tum ma biribiara akɔ yie ndɛ?

 Bible no ma yehu dɛ Nyankopɔn eyi ɔkandzifo bi a ɔfata paa a yebotum dze hɛn werɛ ahyɛ no mu. Ɔno nye Jesus Christ. (Ndwom 2:6) Jesus nye Nyankopɔn n’Ahendzi no do hen. Nyankopɔn ahyehyɛ dɛm ahendzi yi wɔ sor, na obedzi nyimpa do tum wɔ asaase yi do.​—Matthew 6:10.

 Aso ebɛgye Jesus ato mu dɛ wo kandzifo? Bible no ma yehu siantsir a dɛm asɛm yi ho hia:

•   “Hom nhyɛ ɔba no [Jesus Christ] enyimnyam, annyɛ dɛm a Nyankopɔn no bo bofuw, na hom bɛsɛɛ wɔ kwan no mu, osiandɛ n’ebufuw dzɛw ntsɛm. Enyigye nye hɔn a wɔnye no ayɛ hɔn guandɔbea nyinara.”​—Ndwom 2:12, NWT.

 Ndɛ nye ber a ɔsɛ dɛ isi obi a ɔbɛyɛ wo kandzifo no ho gyinae. Bible nkɔnhyɛ ma yehu dɛ Jesus hyɛɛ ase dzii tum wɔ 1914, na ɔnnkɛkyɛr Nyankopɔn n’Ahendzi no beyi nyimpa aban nyinara efi hɔ, na woeedzi tum wɔ asaase yi do.​—Daniel 2:44.

 Sɛ epɛ dɛ etaa Jesus no tumdzi ekyir a, kenkan asɛm a wɔato dzin “Choose to Support God’s Kingdom Now!” na ibohu dza ɔwɔ dɛ eyɛ.