Yɛ otsii fioo ni kã wɔhiɛ nɛɛ mli lɛ, abaafɔ̃ oshiki yɛ maji srɔtoi anɔ yɛ je lɛŋ hei babaoo kɛhole maŋ hiɛnyiɛlɔi. Mɛi miikpɛ yiŋ ni he hiaa waa yɛ mɔ ni amɛbaahala lɛ akɛ amɛmaŋ hiɛnyiɛlɔ lɛ he.

 Mɛni Biblia lɛ kɛɔ yɛ he?

 Biblia lɛ hãa wɔnaa nɔ ko ni tsɔɔ akɛ adesai ahiɛnyiɛlɔi lɛ anyɛmɔ yawaa he ko.

•   “Nyɛkɛ nyɛhiɛ akafɔ̃a lumɛi anɔ, loo gbɔmɔ bi ko, ni yiwalaheremɔ ko bɛ edɛŋ lɛ nɔ. Kɛ́ emumɔ je emli lɛ, eyaa shikpɔŋ ekoŋŋ; nakai gbi lɛ nɔ nɔŋŋ lɛ, eyiŋtoi laajeɔ.”​—Lala 146:3, 4, shishigbɛ niŋmaa.

 Hiɛnyiɛlɔi ni bɔɔ mɔdɛŋ waa po baagbo wɔsɛɛ ko kɛ̃. Kɛfata he lɛ, amɛnyɛŋ amɛma nɔ ni akɛ mɛi ni baaye amɛsɛɛ lɛ baatsa nitsumɔi kpakpai ni amɛtsu lɛ nɔ.​—Jajelɔ 2:18, 19.

 Anɔkwa sane ji akɛ, Biblia lɛ tsɔɔ akɛ, abɔɔɔ adesai akɛ amɛye adesai anɔ kɔkɔɔkɔ.

•   “Bɔ ni gbɔmɔ ni nyiɛ lɛ baakudɔ lɛ diɛŋtsɛ enajifaamɔi ehã po lɛ, ebɛ edɛŋ.”​—Yeremia 10:23.

 Ani mɔ ko yɛ ni baanyɛ afee hiɛnyiɛlɔ kpakpa yɛ wɔbe nɛɛ mli?

 Biblia lɛ tsɔɔ akɛ, Nyɔŋmɔ ehala hiɛnyiɛlɔ ko ni sa jogbaŋŋ ni anyɛɔ amuɔ afɔ̃ɔ enɔ: Yesu Kristo. (Lala 2:6) Yesu ji Nyɔŋmɔ Maŋtsɛyeli lɛ, ni ji nɔyeli ni baaye nɔ kɛjɛ ŋwɛi lɛ nɔ Maŋtsɛ.​—Mateo 6:10.

 Ani obaahala Yesu akɛ ohiɛnyiɛlɔ? Biblia lɛ tsɔɔ nɔ hewɔ ni sanebimɔ nɛɛ he hia waa lɛ:

•   “Nyɛkɛ woo ahãa bi lɛ [Yesu Kristo], kɛjeee nakai lɛ Nyɔŋmɔ mli baafu ni abaakpãtã nyɛhiɛ yɛ gbɛ lɛ nɔ, ejaakɛ Nyɔŋmɔ mlifu lɛ baa oya. Mɛi fɛɛ ni baa lɛ abo lɛ yɛ miishɛɛ.”​—Lala 2:12.

 Amrɔ nɛɛ ji be ni esa akɛ okpɛ oyiŋ. Biblia gbalɛ hãa wɔnaa akɛ Yesu bɔi nɔyeli yɛ afi 1914, ni etsɛŋ Nyɔŋmɔ Maŋtsɛyeli lɛ baaye adesai anɔyelii fɛɛ anajiaŋ.​—Daniel 2:44.

 Kɛ́ ootao ole bɔ ni obaafee ofi Yesu nɔyeli lɛ sɛɛ lɛ he saji krokomɛi lɛ, kanemɔ sane ni ji “Fi Nyɔŋmɔ Maŋtsɛyeli Lɛ Sɛɛ Bianɛ!” lɛ.