Sìgà gbò sè ea gé dú sĩ́ àla, bàé tẹ́lẹ̀gì kpá gbẹá gã́bug dó beeá ló bàlà booí. Gbò nen gé negàgì béèlàfùl ea palàge dú bíi ea kil ló nen e bàé tẹ́lẹ̀ kpá nè.

 Éé ní e Kpá Káí kọ́ kilma ló é?

 Kpá Káí kọ́ ene kà nú e gbò e bà gé bẹl náa é láá naa.

•   “Ógá dẹlẹ nyíé boo gbò nvín méné àbèè gbò nen, e bà náa é láá dùùlà ni. A nyómá aàẹ́ m, ẹlẹ ooà kil mm̀ kunukẽ̀; a bug pe tà kà lèlà deeá.”​—Psalm 146:​3, 4, émì nu ea di kè kẽ.

 Kọ̀bèè gbò e bà láá palàge ge bẹ̀l é beè ù. Gbáló vó, bà náa é láá àgala boo kọọ̀ gbò e bàé bẹl tṍó e baala á gé nàè é tú gbò lé tóm e bà géè siè kilmà sĩ́.​—Ẹ̀klìzíástìs 2:​18, 19.

 Kà-kà bel ea dì dú kọọ̀, Kpá Káí náa kọ é nyimá kọọ̀ Bàrì náa beè dèm gbò nen kọ bàá bẹ̀l ba bá.

•   “Náa lela ló nen ea gé kyãà ge lele bã̀àna a kátọ.”​—Jèrèmáíà 10:23.

 É kọọ̀ à íe nen ea é láá bẹ̀l mm̀ lé bá deè nieí?

 Kpá Káí baatẽ́ kọọ̀ Bàrì a íbá ló nen ea bọ́ló dẹ̀lẹ̀ nyíé boo kọ á bẹ̀l: ea dú Jíízọ̀s Kráìst. (Psalm 2:6) Jíízọ̀s ní ea dú Méné boo Boǹ Méné Bàrì e, ea dú bẹbẹ̀l ea é bẹl aa káála.​—Máátìù 6:10.

 É kọọ̀ olo é zigà kọọ̀ Jíízọ̀s á bẹ̀l ní boo? Kpá Káí kọ́ nú ea náa vaá bíbvá à palàge dú bíi:

•   “Nveenii ka ló a sã́áná [ea dú Jíízọ̀s Kráìst], be níì vó nì Bàrì é nveè súng vaá kyọ̀i sĩ́, boo béè kọọ̀ A súng ólò gbalá. Gbò e bà tú Jìhóvà naamá ba ketõ̀ò kpènà á ié ẹ́ẹ́ nyíe.”​—Psalm 2:12.

 Kátogóí ní ea dú kà lé tṍó gè nè o béèlàfùl e. Gbò kọ́ọ̀ bùlà Bàrì ea di mm̀ Kpá Káí tẹ́lẹ bàlà kẽ kọọ̀ Jíízọ̀s beè dààà togó ge bẹ̀l mm̀ gbáá 1914, nè ge kọọ̀ Boǹ Méné Bàrì é nyááá ló kọ̀láá kà bẹbẹ̀l gbò nen.​—Dániẹ̀l 2:44.

 Be ò gbĩ́ì ge kpáá nyimá nú ea kil ló bé eo é láá nvèè sãa kúm bẹbẹ̀l Jíízọ̀s naa, bugi togó bel ea kọ́ọ̀ “Beeláfùl Ge Nvèè Sãa Kúm Boǹ Méné Bàrì Kátogóí!”