To osẹ he to nukọn ja lẹ mẹ, yè na blavo to otò susu lẹ mẹ lẹdo aihọn pé. Mẹlẹ to nudide titengbe lẹ bayi gando mẹhe yé na de di nukọntọ go.

 Etẹ Biblu dọ gandego?

 Biblu dohia dọ gbẹtọvi he yin nukọntọ lẹpo wẹ do dogbó.

•    “Mì ze jidide mìtọn do ahọvi lẹ mẹ blo kavi do gbẹtọvi depope mẹ blo, na yé ma sọgan whlẹnmẹ gán. Eyin gbọfufu etọn tọ́nyi, ewọ nọ gọ̀ do aigba dè; to azán enẹ gbè, linlẹn etọn lẹ nọ sudo.”—Salmu lẹ 146:3, 4, nudọnamẹ odò tọn.

 Nukọntọ he nọ wà dagbe taun lẹ tlẹ nọ wá kù. Gbọnvona enẹ, yé ma gán kudeji dọ mẹhe na wá jẹ otẹn emitọn mẹ lẹ na gbẹ̀nkàn do azọ́n dagbe he emi wà lẹ nù.—Yẹwhehodọtọ 2:18, 19.

 Nugbo lọ wẹ yindọ, Biblu dohia dọ Jiwheyẹwhe ma dá gbẹtọvi lẹ na yé nido dugán do yenọzo ji paali.

•    “E ma tin to huhlọn mẹhe to zọnlinzin tọn mẹ nado deanana afọdide etọn lẹ.”—Jelemia 10:23.

 Be mẹde tin bo gán yin nukọntọ dagbe de to egbehe ya?

 Biblu dọ dọ Jiwheyẹwhe ko de nukọntọ dagbe hugan de he jẹna jidedego, enẹ wẹ Jesu Klisti. (Salmu lẹ 2:6) Jesu wẹ yin Ahọlu Ahọluduta Jiwheyẹwhe tọn, yèdọ gandudu de he na paṣẹ sọn olọn mẹ.—Matiu 6:10.

 Be e na jlo we nado de Jesu taidi nukọntọ ya? Biblu zinnudo nuhewutu kanbiọ enẹ do yin nujọnu ji:

•    “Mì gbògbéna visunnu lọ [Jesu Klisti], na Jiwheyẹwhe nikaa gblehomẹ bọ mìwlẹ na yin vivasudo sọn aliho lọ ji, na homẹgble Etọn sọgan yawu fọ́n. Ayajẹnọ wẹ mẹdepope he yí Ewọ do basi fibẹtado etọn.”—Salmu lẹ 2:12.

 Ojlẹ lọ die na a nido basi nudide de. Dọdai Biblu tọn lẹ dohia dọ Jesu ko jẹ gandu ji sọn 1914, podọ to madẹnmẹ Ahọluduta Jiwheyẹwhe tọn na yítẹn to gandudu gbẹtọvi tọn lẹpo si.—Daniẹli 2:44.

 Eyin a jlo na plọnnu dogọ gando lehe a gán nọgodona Jesu taidi nukọntọ do go, hia hosọ lọ “Nọgodona Ahọluduta Jiwheyẹwhe Tọn Bẹsọn Din!”