Kukwe ütiäte rabai diandre nuaindre jai nitre ie. ¿Mä tö nire tuai ja gobraine?

 ¿Dre nieta Bibliakwe?

 Gobran jökrä kä nebätä di braibe ye mikata gare Bibliakwe.

•   “Munkwe ñaka tö ngwan príncipe aune nitre mada ie, ñobätä ñan aune ñan raba ni mike kwäre. Üai yeta niken mento, niarata nikenta dobrote; ye näire erametre töita krüte jökrä” (Salmo 146:3, 4 nota).

 Gobrantre kä nebätä ye dite akwa jökrä tätre krüte. Ne madakäre niarakwe sribibare kwin akwa gobran mada rabai täte ye käkwe sribi kwin ye nuaindi jankunu ye niara ñaka raba niere (Eclesiastés 2:18, 19).

 Ni kä nebätä ñan sribebare ja gobrainkäre akwle ye mikata gare Bibliakwe.

•   “Ni kä nebätä ie ja jie ngwandre ño ye ñaka gare jire” (Jeremías 10:23).

 ¿Ni tärä iti ne ngwane abokän raba gobrane kwin?

 Ni ie tö ngwan raba aune raba gobrane kwin ye dianinkä Ngöbökwe Gobrankäre ye mikata gare Bibliakwe, ni ye abokän Jesukristo (Salmo 2:6). Niara Gobranka Gobran Ngöbökwe te, Gobran ye tä ükaninte kä kwinbätä aune yete gobranta (Mateo 6:10).

 ¿Mäkwe Jesús tuainmetre ja Gobraine? Ñobätä nikwe kukwe ütiäte ne diandre nuaindre jai ye Biblia tä mike gare.

•   “Monsoi [Jesús] mike ütiäte jai: ñakare aune Ngöbö rabai rubun mun kräke aune mun krütai ji ngrabare, ñobätä ñan aune niara nemen rubun jötrö ngwarbe. ¡Nire nire tä ja kriemikamana ie ye jökräbätä kätä juto!” (Salmo 2:12).

 Ne ngwane kukwe diandre nuaindre jai profecía Bibliabätä tä mike gare Jesús jatani Gobrane kä 1914, profecía tä mike gare arato, Gobran Ngöbökwe ye köböra nemen gobran jökrä kä nebätä ye täte (Daniel 2:44).

 Ño mä raba Gobran Jesukwe ye dimike ye mä törba mikai gare jai ngwane, mä raba ñäke articulo “Apoyemos ahora el Reino de Dios” yebätä.