Tib neeg yuav tau txiav txim seb lawv yuav xaiv leej twg los ua lawv tus thawj coj.

 Phau Vajlugkub hais li cas?

 Phau Vajlugkub qhia tias tib neeg tej nom tej tswv tsuas ua tau me ntsis xwb.

•   “Tsis txhob tso siab rau tej nom tswv, lawv yog neeg xwb, lawv yeej pab tsis tau nej dim kev ploj kev tuag li. Thaum lawv tuag, lawv yuav rov mus ua av; lawv tej tswvyim yuav kawg rau hnub ntawd.”​—Phau Ntawv Nkauj 146:3, 4.

 Txawm tej tug nom tswv kav tau zoo tshaj plaws los yeej yuav dua mus. Tsis tas li ntawd xwb, lawv yeej lav tsis tau tias tiam tom qab yuav coj raws li tej kev cai lij choj uas lawv tsim tsa.​—Tej Lus Qhia 2:18, 19.

 Qhov tseeb tiag, phau Vajlugkub qhia meej tias tib neeg yeej kav tsis tau lawv tus kheej.

•   “Tsis yog neeg coj tau neeg tshais kauj ruam.”​—Yelemi 10:23.

 Niaj hnub no puas muaj ib tug uas coj tau tib neeg li?

 Phau Vajlugkub piav tias Vajtswv twb tsa ib tug thawj coj uas peb tso siab tau lawm. Nws yeej yuav ua tau hauj lwm kom tiav. Nws yog Yexus Khetos. (Phau Ntawv Nkauj 2:6) Yexus yog tug Vajntxwv uas kav Vajtswv lub Nceeg Vaj. Lub Nceeg Vaj ntawd yog ib lub tseem fwv uas kav saum ntuj tuaj rau lub ntiaj teb no.​—Mathais 6:10.

 Koj puas yuav xaiv Yexus ua tus coj? Phau Vajlugkub qhia tias vim li cas nug li no ho tseem ceeb:

•    ‘Cia li hwm [Yexus Khetos] ntshai tsam [Vajtswv] chim ces nej puam tsuaj rau hauv nej txojkev, rau qhov Nws txojkev npau taws tshwm plaws sai kawg. Txhua tus uas los cawm siav rau hauv Nws yuav tau nyob kaj siab lug.’​—Ntawv Nkauj 2:12.

 Tam sim no yog lub sij hawm koj yuav tau xaiv. Phau Vajlugkub tej lus faj lem qhia tias Yexus twb pib kav xyoo 1914 lawm. Tshuav tsis ntev xwb Vajtswv lub Nceeg Vaj yuav hloov tag nhro tib neeg tej tseem fwv tib si.​—Daniyees 2:44.

 Yog xav paub ntxiv seb koj yuav txhawb Yexus ua tus thawj coj li cas, mus nyeem zaj “Txhawb Vajtswv Lub Tseem Fwv Tamsim No.”