Tin aytal an semanas tin puwél an Tsabál neʼets ka waʼtsin i elecciones abal ka takuyat an eyalchik. Jajáʼchik kwaʼal kin takuy kʼal jitaʼ in léʼ ka abatnáj.

 ¿Jantʼoj tu exóbchal an Biblia tin kwéntaj axéʼ?

 An Biblia in olnál jantʼoj yab in éjtowal kin tʼajaʼ an eyal.

•   «Yab ka lej belaʼ kʼal an eyalchik o kʼal kʼeʼat i atikláb kom jajáʼchik yab in éjtowal ti kʼáninchij a ejatal. Jajáʼchik jayej u tsémel, u wichél ti pojodh ani u talél in tsalápil» (Salmo 146:3, 4, nota).

 Belits max jun i eyal lej witʼádh, jajáʼ jayej u tsémel. Tam ka punuwat kʼeʼat i eyal, jajáʼ yabáts neʼets kin áynanchij kʼal jawaʼ in kwaʼalak tsalpadh axi jun an eyal (Eclesiastés 2:18, 19).

 An Biblia in olnál abal an atiklábchik yab tsʼejkadh abal kin ábatnaʼ tin kwetemtal.

•   «An atiklábchik yab in tomnál kin béldhaʼ in kwetém belil» (Jeremías 10:23).

 ¿Walám waʼats jun axi kin ejtow ti ábatnom alwaʼ?

 An Biblia in olnál abal a Dios in bijiyámal jun i tsʼalej axi lej bajudh abal ti ábatnom, a Jesucristo (Salmo 2:6). Axéʼ xi tsʼalej kʼwajat ti éb ani játs axi kʼwajat ti ábatnom tin Éyaltal a Dios (Mateo 6:10).

 ¿Neʼets ka takuy a Jesús abal ti ábatnom? An Biblia tu ólchal jaleʼ ti lej exbadh ki takuy jajáʼ:

•   «Ka puwénchij a Jesucristo. Max yab ka tʼajaʼ, a Dios neʼets ka tsákuy kʼal tatáʼchik ani neʼets ki tsemets kom Jajáʼ dhubat u tsakúl. «Neʼets kin atsʼaʼchik lej kulbél jitaʼ u utel kʼal Jajáʼ» (Salmo 2:12).

 Xowéʼ tin tomnál ki takuyits jantʼoj neʼets ki tʼajaʼ. An Biblia tu tejwamédhanchal abal a Jesús tujey ti ábatnom ti 1914 ti éb. Waʼats yan i kʼej kaw ti Biblia axi tu tejwamédhanchal abal in Éyaltal a Dios weʼits neʼets kin kalchiy patal an eyalchik axi waʼats tejéʼ tsabál (Daniel 2:44).

 Max a léʼ ka exlaʼ jantʼiniʼ ka tólmiy in Éyaltal a Dios, ka ajiy axéʼ xi artículo axi in bij «Apoyemos ahora el Reino de Dios».