SIGGA-SIFU KAMU!
Sinni nga Lider i Piliammu?—Anni i Kagian na Biblia?
Magangngua i totolay tu importante nga desision nu sinni ira nga lider i piliadda.
Anni i kagian na Biblia?
Limitadu i makua na totolay ira nga lider
Nakagi ta Biblia i limitasion na ngamin nga totolay nga lider.
“Ari ka nga mammakatalo ta mammaguray ira; maski sinni nga tolay ay ari makapaliag vuluvuga. Manoli ira ta davvun nu matay ira; tatun mismu nga aggaw ay manuppal ngamin i talakkurug da [onu ‘panono da,’ NW].”—Salmo 146:3, 4.
Matay gabbalaman maski i kapianan ira nga lider. Ari da gapa masiguradu nga ituloy na manali nira i makasta ira nga kikkingngua da.—Eclesiastes 2:18, 19.
I kurug, kagian na Biblia nga ari vuluvuga mapammagurayan na totolay i baggi da lagapa.
“Ari nga mawayya na tolay nga lumalakag nga itunung maski i dakkua na.”—Jeremias 10:23.
Egga kari i mapia nga lider ta tiempo tam?
I lider nga pinili na Dios
Nepakanawag na Biblia nga nappili i Dios tu kapianan anna mapammakatalakkan nga lider, si Jesu-Cristo. (Salmo 2:6) Si Jesus i Patul na Pappatulan na Dios—gobiernu nga mammaguray ta langi.—Mateo 6:10.
Suportammu kari i pammaguray ni Jesus? Ipasingan na Biblia nu ngatta importante yatun:
“Dayawan nu i ana [si Jesu-Cristo], ta nu ari, ay malussaw i Dios anna madaral kamu, ta mabbatta insigida i poray Na. Magayayya i ngamin nga makiyegu Nisa.”—Salmo 2:12, NW.
Tiempo ngana tapenu maddesisiokka. Ipasingan na profesiya ta Biblia nga namegafu nga nammaguray si Jesus turi 1914 anna aranni ngana nga talianan na Pappatulan na Dios i ngamin nga gobiernu na totolay.—Daniel 2:44.
Tapenu mammuan i mas aru paga nu kunnasim masuportan i pammaguray ni Jesus, bibbigan i artikulo nga “Mawag tu Suportattam Ngana Sangawe i Pappatulan na Dios!”