Iti sumaruno a lawlawas, addanto eleksion iti nadumaduma a pagilian iti intero a lubong. Mangaramid dagiti tattao iti importante a desision ta pilienda dagiti agbalin a liderda.

 Ania ti ibaga ti Biblia?

 Ibaga ti Biblia ti limitasion ti amin a tattao a lider.

•   “Saankayo nga agtalek kadagiti prinsipe wenno uray iti tao ta saan a makaisalakan. Mapugsat ti angesna, agsubli iti daga; iti dayta met la nga aldaw, mapukawen ti panunotna.”—Salmo 146:3, 4.

 Uray dagiti kalaingan a lider ket matay. Kasta met, saanda a masigurado nga aniaman a nasayaat nga inaramidda ket itultuloyto nga aramiden dagiti sumaruno kadakuada.—Eclesiastes 2:18, 19.

 Ti agpayso, ipakita ti Biblia a saan a nairanta nga iturayan dagiti tattao ti bagbagida.

•   “Saan a naikkan ti tao iti autoridad a mangiturong uray iti addangna.”—Jeremias 10:23.

 Adda kadi asinoman a makaipaay iti nasayaat a panangituray ita?

 Ilawlawag ti Biblia nga inapointaran ti Dios ti kalaingan ken mapagtalkan a lider: ni Jesu-Kristo. (Salmo 2:6) Ni Jesus ti Ari ti Pagarian ti Dios, maysa a gobierno nga agturturay manipud langit.—Mateo 6:10.

 Piliem kadi ni Jesus kas lider? Ipakita ti Biblia no apay a napateg ti desisionmo:

•   “Padayawanyo ti anak [ni Jesu-Kristo], ta no saan, makapungtot ti Dios ket madadaelkayo ta bumtak a dagus ti ungetna. Naragsak ti amin nga agkamang Kenkuana.”—Salmo 2:12.

 Itan ti tiempo nga agdesisionka. Ipakita ti padto ti Biblia a nangrugin nga agturay ni Jesus idi 1914 ken asidegen a suktan ti Pagarian ti Dios ti amin a gobierno ti tao.—Daniel 2:44.

 Tapno maammuam ti ad-adu pay no kasano a masuportaram ti panagturay ni Jesus, basaem ti artikulo a “Suportaram ti Pagarian ti Dios Itan!”