Rait ya nou yu av a uol iip a piipl we a tingk aad bout di liida we dem fi pik wen taim kom fi dem go vuot.

 Wa di Baibl av fi se bout dis?

 Di Baibl mek wi nuo se aal a di ruula dem pan ort av wan prablem an kaaz a dat, dem kyaahn du moch fi wi.

•    “Yu no fi chos iina piipl laik se a dem yu a dipen pan fi siev yu, nat iivn wan a di liida dem. Im laif go out, im go bak tu di grong; pan da die de, aal we im nuo paas we.”​—Saam 146:3, 4.

 Tingk bout dis tu. No mata ou gud di liida bi, wan die im a-go ded. Pan tap a dat, non a dem liida de kyaahn du notn fi mek shuor se di sumadi we tek uova fram dem a-go gwaan du di gud sitn dem we dem did a du.​—Iikliiziyastiiz 2:18, 19.

 Matarafak, di Baibl mek wi nuo se piipl neva mek fi ruul uova ada piipl.

•    “It no op tu man fi iivn disaid fi imself ou im fi waak.”​—Jerimaiya 10:23.

 So yu tingk wi av nobadi we kuda ruul uova wi rait ya nou an ruul wi iina di bes wie?

 Di Baibl mek wi nuo se Gad pik sumadi fi ruul uova wi we im chos an a sumadi we a-go ruul uova wi iina di bes wie. Da sumadi de a Jiizas Krais. (Saam 2:6) Gad av wan Kindom govament we im set op iina evn, an a Jiizas Krais a di King fi da Kindom de.​—Matyu 6:10.

 So, yu a-go pik Jiizas fi ruul uova yu? Di Baibl mek wi nuo wa mek dis a wan big ting fi wi mek op wi main bout:

•    “Shuo nof rispek tu Gad Bwai Pikni [dat a Jiizas Krais], kaa ef yu no du dat, Gad a-go beks bad an wen dat apm a don yu don fa, kaa im a-go get beks kwik. Aal a uu a shuo se dem a chos iina im, dem a-go api kyaahn don.”​—Saam 2:12.

 A dis a di taim fi wi mek op wi main bout uu wi waahn fi ruul uova wi. Gad yuuz im prafit dem fi rait dong tingz iina di Baibl fi mek wi nuo se Jiizas did staat fi ruul az King iina 1914. An suun suun, Gad Kindom a-go get rid a aal a dem govament ya an a it wan a-go ruul.​—Daniyel 2:44.

 Fi fain out muor bout wa yu kyan du fi shuo se a Jiizas yu waahn fi ruul uova yu, lisn dis: “Wa Yu Fi Du Nou Fi Shuo Se A Gad Kindom Yu Se!”