Moivike inini i li komesho, moilongo ya yoolokafana mounyuni aushe otamu ka ningwa omahoololo. Ovanhu otava ka ninga omatokolo a fimana e na sha nomuwiliki oo tava ka hoolola.

 Ombiibeli otai ti ngahelipi?

 Ombiibeli oya popya omangabeko oo ovawiliki vopanhu ve na.

•    ‘Oidale hayo mu lineekela, havanhu ava vehe nekwafo nande. Omuku ngeenge wa pwa mo muvo, otava shuna medu nefiku tuu olo, omadiladilo avo kae po vali.’ — Epsalme 146:3, 4.

 Nokuli novawiliki vawa ohava fi. Nongeenge ova fi ihapa kala oumbangi oo tau ulike kutya ovo tave ke mu shikula otava ka twikila noilonga yaye iwa. — Omuudifi 2:18, 19.

 Ombiibeli oya popya kutya ovanhu inava shitwa nelalakano lokulipangela vo vene.

•    “Ondjila yomunhu ihai kala mepangelo laye mwene, ile mepangelo lomulumenhu, nhumbi ta ende, nhumbi ta yukifa eenghatu daye.” — Jeremia 10:23.

 Mbela ope na omunhu oo ta dulu okukala omupangeli muwa kunena?

 Ombiibeli oya popya kutya Kalunga okwa nangeka po omuwiliki a denga mbada nomulineekelwa, Jesus Kristus. (Epsalme 2:6) Jesus oku li Ohamba yOuhamba waKalunga, epangelo olo tali pangele okudja meulu. — Mateus 6:10.

 Mbela oto ka hoolola Jesus e li Omuwiliki? Ombiibeli oya ulika nghee sha fimana okuninga etokolo olo:

•    “Xupiteni Omona [Jesus Kristus] komilungu, opo ehe mu handukile ndele tamu nyonauka mondjila yeni; osheshi ehandu laye kali kwete kufuluka. Ovanelao ovava aveshe have mu lineekele.” — Epsalme 2:12.

 Paife olo efimbo wa pumbwa okuninga etokolo. Omaxunganeko Ombiibeli okwa ulika kutya Jesus okwa hovela okupangela mo 1914. Mafiku, Ouhamba waKalunga otau ka pingena po omapangelo aeshe opanhu. — Daniel 2:44.

 Opo u mone ouyelele muhapu u na sha nanghee to dulu okuyambidida Jesus e li omupangeli, lesha oshitukulwa “Yambidida Ouhamba waKalunga paife!”