سەرگەك بولىڭدار!
ٴسىز قاي بيلەۋشىنى تاڭدايسىز؟ كيەلى كىتاپتا نە دەلىنگەن؟
ادامدار كىمگە داۋىس بەرەتىنىن شەشكەندە وتە ماڭىزدى تاڭداۋ جاسايدى.
كيەلى كىتاپتا نە دەلىنگەن؟
ادامي بيلەۋشىلەردىڭ مۇمكىندىگى شەكتەۋلى
كيەلى جازبالاردا بۇكىل ادامي بيلەۋشىلەرگە ٴبىر نارسە ٴتان ەكەنى ايتىلادى.
«بەكزادالارعا ارقا سۇيەمەڭدەر، ەش قۇتقارا المايتىن ادام بالاسىنا دا سەنىم ارتپاڭدار. ونىڭ دەمى ٴبىتىپ، قارا جەرگە ورالادى، سول كۇنى-اق بار وي-نيەتى قۇرىپ جوعالادى» (ٴزابۇر 146:3، 4، سىلتەمە).
ەڭ مىقتى دەگەن باسشىنىڭ ٶزى ەرتەلى-كەش ٶلىم قۇشادى. ونىڭ ۇستىنە، ولاردىڭ باستاپ كەتكەن يگى ىستەرىن وزدەرىنەن كەيىنگىلەر جالعاستىراتىنىنا ەش كەپىلدىك جوق (ۋاعىزداۋشى 2:18، 19).
نەگىزى، كيەلى كىتاپقا ساي، ادام ادامنىڭ ۇستىنەن ەشقاشان بيلىك ەتپەۋ كەرەك بولعان.
«ادام ٴتىپتى ٶز قادامىنا باعىت بەرە المايدى» (ەرەميا 10:23).
قازىرگى ۋاقىتتا جاقسى بيلەۋشى بار ما؟
قۇدايدىڭ ٶزى تاڭداعان بيلەۋشى
كيەلى كىتاپتا قۇدايدىڭ ەڭ بىلىكتى، ەڭ سەنىمدى باسشى تاعايىنداپ قويعانى ايتىلعان، ول — يسا ٴماسىح (ٴزابۇر 2:6). يسا — قۇداي پاتشالىعىنىڭ، ياعني كوكتەن بيلىك جۇرگىزەتىن ۇكىمەتتىڭ پاتشاسى (ماتاي 6:10).
ال ٴسىز بيلەۋشى ەتىپ يسانى تاڭدايسىز با؟ كيەلى كىتاپ بۇل تاڭداۋدى جاساۋدىڭ قانشالىقتى ماڭىزدى ەكەنىنە ەرەكشە نازار اۋدارادى.
«ۇلىنا [يسا ماسىحكە] قۇرمەت كورسەتىڭدەر، ايتپەسە قۇداي قاھارىنا مىنەدى دە، سەندەر قۇرىپ جوق بولاسىڭدار. سەبەبى ونىڭ اشۋى لەزدە لاپ ەتە قالادى، ال قۇدايدى پانالايتىن اركىم باقىتتى بولادى» (ٴزابۇر 2:12).
قازىر ٶز تاڭداۋىڭىزدى جاسايتىن ۋاقىت. كيەلى كىتاپتاعى پايعامبارلىققا ساي، يسا 1914-جىلى بيلىك ەتۋىن باستادى جانە جۋىردا قۇداي پاتشالىعى بۇكىل ادامي ۇكىمەتتەردىڭ ورنىن باسىپ، ٶزى عانا بيلىك ەتەتىن بولادى (دانيال 2:44).
يسانىڭ بيلىگىن قالاي قولداي الاتىنىڭىزدى ٴبىلۋ ٷشىن، «قۇداي پاتشالىعىن قازىردەن باستاپ قولداڭىز!» دەگەن ماقالانى قاراڭىز.