Munyilungu yantesha hohu yinashaliku, mumatuña amavulu mukaayi antu akutondaña anlomboli. Antu anakushaku muchima chikupu kulonda atondi anlomboli anakukeñawu.

 Indi Bayibolu yahoshahu nawudi?

 Bayibolu yashimuna wuswa wakuminamu wukwetiwu anlomboli awantu ejima.

•   “Bayi wukuhwelela ayilolu hela mwana kamuntu, wunateli kubula kuleta wamwinuku. Muya windi wafumañamu, wafuntaña kwiseki; Hadodenodu ifuku yitoñojoka yindi yakisikaña.”—Isamu 146:3, 4, tumazu twaheshina.

 Nianyuuli ayuulaña chachiwahi afwaña. Cheñi hiyanateli kushimuna nawu, neyi anafwi nyidimu yawu yayiwahi akatwalekahu kuyizata kudi akayisinsaku.—Mukwakutañisha 2:18, 19.

 Chuma chacheni chaleteshaña, Bayibolu yashimuna nawu antu hiyayileñeli nawu adiyuuleña awenawuku.

•   “Muntu wunakwenda hakutwesha kwiluka nichakulombola ntampu jindiku.”—Yeremiya 10:23.

 Kudihu muntu wunateli kuyuula chiwahi makonu?

 Bayibolu yashimuna nawu Nzambi watonda nyuuli watelela nawa itwatela kukuhwelela: Yesu Kristu. (Isamu 2:6) Yesu diyi Mwanta waWanta waNzambi, nfulumendi yayuulilaña mwiwulu.—Matewu 6:10.

 Komana mukukeña Yesu ekali nlomboli yenu? Bayibolu yashimuna chichalemena kumutonda Yesu kwikala nlomboli yetu nawu:

•   “Mulemeshenu mwana [Yesu Kristu], neyi nehi Nzambi wukuzuwa nawa mukujilumukila munjila, muloña kuzuwa Kwindi kwabutukaña swayi. Adi namuzañalu wowu antu ejima anabatami mudi Yena.”—Isamu 2:12.

 Yinu diyi mpinji yimwatela kufuukulahu. Wuprofwetu wamuBayibolu wamwekeshaña nawu Yesu watachikili kuyuula muchaaka cha 1914 nawa washimuna nawu katataka Wanta waNzambi wusinsi nfulumendi jawantu.—Danyeli 2:44.

 Hakwila mwiluki chimunateli kuhakwilaku wulomboli waYesu, tañenu chibaaba chinakuhosha nawu “Tondenuhu Kuhakwilaku Wanta waNzambi Yinu Mpinji!”