Kuom jumbe matin mabiro, ibiro tim yiero e pinje mopogore opogore. Sani ji osechako ng’ado e chunygi ni gin jotelo mage ma gibiro yiero.

 Gima Muma wacho

 Muma wacho gimoro ma jotelo duto mag dhano oremie.

•   “Kik iket genoni kuom jotelo mag piny, kata kuom dhano, nimar ok onyal waro ng’ato. Muche rumo kendo odok e lowo; chieng’no e ma gik ma oparo duto lalie.”​—Zaburi 146:3, 4.

 Kata mana jotelo mabeyo, e gikone biro tho. Bende, ok ginyal wacho ka gin gi adier ni jotelo ma biro kawo kargi ka gisetho biro dhi nyime timo gik mabeyo ma ne gitimo ne ji.​—Eklesiastes 2:18, 19.

 Adiera en ni Muma nyiso ni dhano ne ok ochue mondo oloch e wi dhano wadgi.

•   “Dhano onge gi teko kata mar chiko ondamone.”​—Jeremia 10:23.

 Be nitie ng’ato ang’ata ma nyalo bedo jatelo maber e kindegi?

 Muma nyisowa ni Nyasaye oseketo jatelo maber kendo minyalo gen ma en Yesu Kristo. (Zaburi 2:6) Yesu e Ruoth mar Pinyruodh Nyasaye ma en sirkal ma locho e polo.​—Mathayo 6:10.

 Be ibiro yiero Yesu mondo obed jatendi? Muma nyiso gimomiyo penjono en penjo maduong’:

•   “Miuru wuod Nyasaye [Yesu Kristo] luor, nono to Nyasaye biro kecho mi ulal nono, nikech mirimbe jaidho piyo. Jo mamor gin jo ma manyo kar buok ire.”​—Zaburi 2:12.

 Sani e ma onego itimie yierono. Weche ma nokor e Muma, nyiso ni Yesu nochako locho e higa mar 1914 kendo ni machiegnini, Pinyruodh Nyasaye biro kawo kar sirkende duto mag dhano.​—Daniel 2:44.

 Mondo ipuonjri weche momedore e yo minyalo riwogo lwedo loch mar Yesu, som sula ma wiye wacho ni, “Riw Pinyruodh Nyasaye Lwedo Sani!”