Semen a wãna sẽn watã pʋgẽ, b na n maana elɛksiyõ-rãmb tẽns toor-toor pʋsẽ dũniyã gill zugu. Nebã na n yãka neb nins b sẽn dat tɩ b yɩ b taoor dãmbã.

 Bõe la Biiblã yet rẽ wɛɛngẽ?

 Biiblã wilgda bũmb a ye sẽn kɩt tɩ ninsaalbã nanambsã fãa sẽn tõe n maanã tar koakã.

•   “Ra teeg-y nanambse, wall ninsaalb sẽn pa tõe n wa ne fãagrã ye. Ninsaal vʋʋsmã sã n wa yõke, a lebda tẽn-gãongẽ wã. Baraar bala, a tagsa wã satame.”—Yɩɩn-sõamyã 146:3, 4.

 Baa naab ning sẽn tar tõog n yɩɩdã wat n baas n kiime. Sẽn paase, a pa tõe n kɩs sɩd tɩ neb nins sẽn na n ledg-a wã na n kell n tʋma tʋʋm-sõma nins a sẽn sɩngã ye.—Koɛɛg soaba 2:18, 19.

 Sɩd-sɩda, Biiblã wilgdame tɩ ninsaalbã pa tol n tõe n soog b mens tɩ zems ye.

•   “Ninsaal sẽn kẽnd pa tõe n wilg a meng sor ye.”—Zeremi 10:23.

 Woto rat n yeelame tɩ naab sẽn yaa sõma pa be rũndã-rũndã bɩ?

 Biiblã wilgdame tɩ Wẽnnaam yãka naab sẽn yaa sõma n yɩɩda, la d sẽn tõe n teege. Yaa a Zeezi Kirist. (Yɩɩn-sõamyã 2:6) A Zeezi yaa Wẽnnaam Rĩungã sẽn yaa goosneemã sẽn be saasẽ wã rĩmã.—Matiye 6:10.

 Yãmb na n sakame t’a Zeezi yɩ y naab bɩ? Biiblã wilgdame tɩ rẽ maaneg tara yõod wʋsgo:

•   “Waoog-y bi-riblã [a Zeezi Kirist], sã n pa rẽ, Wẽnnaam sũur na n wa yikame tɩ y sãame, bala a sũurã yikda tao-tao. Sũ-noog rãmb la neb nins sẽn soonded a nengẽ wã.”—Yɩɩn-sõamyã 2:12.

 Yaa masã meng la y segd n yãk yam. Biiblã bãngr-goamã wilgdame t’a Zeezi sɩnga naam dɩɩb yʋʋmd 1914, la tɩ ka la bilfu Wẽnnaam Rĩungã na n ledga ninsaalbã goosneemã-rãmbã fãa.—Dãniyɛll 2:44.

 Y sã n dat n bãng y sẽn tõe n teel a Zeezi naamã to-to wã n paase, bɩ y karem sõsg ning gom-zug sẽn yaa: “Yãk-y yam masã n teel Wẽnnaam Rĩungã!”