Mu visimano vi na hatako, vifuti via vingi vi ka linga lihangulo. Vantu va ka linga cihangula ca seho ca iya a ka pua ntuamena uavo.

 Vika Mbimbiliya ya handekaho?

 Mbimbiliya ya tumbula cimo cuma ka va hasa ku linga vantuamena vose va hano ha mavu.

•   “Kati u tsiliele vamiata, Cipue muana muntu, muli ikeye ka muesi vukuasi. Muku ueni u tuhuka, a hiluka ku livu lieni; Mu litangua olio vene visinganieka vieni vi nonga.”—Visamo 146:3, 4.

 Cipue vene vantuamena va cili, ku heta haze navo ve ku tsa. Cikuavo naua, nomu mu va hasa ku linga muahi mangana vantuamena va keza ku nima yavo, va ka tualeleleho ku linga via cili.—Ekelesiaste 2:18, 19.

 Kaha Mbimbiliya ya muesa mpundu ngecize, vantu ka va va tangele na vuhasi vua ku lituamenena vakevo vavene.

•   “Njila ya muntu ka ya hitukilile ivene; Ka muesi muli muntu mukua ku enda ku liinikila vinanga vieni.”—Yelemiya 10:23.

 Vuno lelo lino kuli umo a hasa ku tu tuamenena mua cili ni?

 Mbimbiliya ya muesa ngecize Njambi ua hangula tuamena ua vutongue kaha u tu hasa ku kulahela: Yesu Kilistu. (Visamo 2:6) Yesu ikeye Muangana ua Vuangana vua Njambi vua kala muilu.—Mateo 6:10.

 Vuno nenu mu tava Yesu ku pua ntuamena yenu ni? Mbimbiliya ya muesa seho ya kala ha ku lingamo nguayo:

•   “Tsuembenu muana [Yesu Kilistu], ku tina a tenuke, nenu mu nonge mu njila, muomu vutenu vueni vu ka suama na kavuasi. Va vezika vose vaze va tinina muli ikeye.”—Visamo 2:12.

 Ino ikeyo ntsimbu ya ku linga cihangula caco. Vupolofeto vua mu Mbimbiliya vua muesa ngecize Yesu ua putukile ku sika mu muaka ua 1914 kaha vuovuno Vuangana vua Njambi vu ka nongesa mavuangana ose a vantu.—Ndaniele 2:44.

 Linga mu tantekeye vikuavo ku tuala ha vati mu hasa ku hakuila ku sika ca Yesu, tandenu cimpande “Hangulenu ku Kuasa Vuangana vua Njambi Ntsimbu Ino!””