Na ya apɔsɔ mɛ na gangɔ ko, elɛksiɔ̃ na lingɔ tɛrɛ lo na ya akɔdɔrɔ ndɛ̃ ndɛ̃ ndɛ̃ na lɛ gigi zu. Azi gba ndo mu ekateli mɛ ngbondoni na omɛ aba zo mɛ ala na pɔnangɔ lo ya, lo du gbia tɛ la.

 Tɛnɛ mɛ Ngbangɔ tɛnɛ nɛ?

 Ngbangɔ ndo fa ndelo mɛ agbia na ni.

•   “Ta elengbi ti kpãngɔ bɛ e na ndo lo-lengɔ gbia tɛ nyi zo ma, ta ala lengbi ti hɛ̃ngɔ e dungɔ lɛ ngɛ̃́ ma. Se nyingɔ tɛ zo si ko, lo diri kaya sese, na bi niko ko, bingangɔ li tɛ lo wɛ.”—Nzembo 146:3, 4, nɔti.

 Abɛse akpengba agbia, ala nga na kpilingɔ. Hãngɔ ni zingɔ, ta ala lengbi ti kpãngɔ bɛ la ya, kwa ti nzɔ̃ni mɛndó ala li ko, azi mɛndɛ̃ mɛ na gangɔ so pɛ ko ala na ngbãngɔ lá kwɛ batangɔ ni ma.—Mosakoli 2:18, 19.

 Ngbangɔ ndo tɛnɛ ya, ta alindó zo ya, lo nvɛ̃ni lo tambwisa tɛrɛ lo ma.

•   “Ta du nzɔ̃ni ya, zo ko ndo nɔ nɔ ka talege ko, lo nvɛ̃ni lo tambwisa gɛrɛ lo ma.”—Yirimia 10:23.

 Zo mɛ lengbi ti lengɔ gbia na ndo e ndɛ na?

 Ngbangɔ kambisa ya, Nzapa pɔna Yezo Kristo gbia kɔi mɛ kpengbani nga ti ndima mɛ elengbi ti kpãngɔ bɛ e na ndo lo. (Nzembo 2:6) Yezo du gbia ti Lo-lengɔ Gbia tɛ Nzapa mɛ adu guvɛrnɛma mɛ ndo li tɛrɛ lo ka ndozu.—Matie 6:10.

 Mɔ na yengɔ pɔnangɔ Yezo ya, lo du gbia tɛ mɔ? Ngbangɔ fa nda mɛ hũnda niko adu ngbondoni, atɛnɛ ya:

•   “Ala tɔndɔ [Yezo Kristo], ti nɛngɔ ya, ta Nzapa ma ngɔnzɔ wa lo kpɔ ala na lége tɛ lo ma, na lo mɛ ya, lo ndo ma ngɔnzɔ iɔ. Dengɔ bɛ na azi zu ko la, ndo kpɛlɛ ti nɛngɔ ya, ala bata tɛrɛ la ka tɛ Nzapa.”—Nzembo 2:12.

 Na olo la, adu ngoi mɛ mɔ lengbi ti mungɔ ekateli. Profesi ti ya Ngbangɔ ndo kambisa ya, Yezo banda lengɔ gbia ka ndozu na 1914, wa Lo-lengɔ Gbia tɛ Nyi Nzapa na mungɔ ndo ti lo-lengɔ gbia tɛ azi.—Danyele 2:44.

 Ti nɛngɔ ya, mɔ hĩnga akpale gba na ndo se me elengbi ti hɛ̃ngɔ ti e na ya Lo-lengɔ gbia tɛ Yezo ko, di bɛ li tɛnɛ mɛ atɛnɛ ya, “Osengeli koluka liboso Bokonzi ya Nzambe lelo oyo!”