KIISĪ LO ETƆƆ̄ BAƐ!
Mɛɛ̄ Na O Gbī Kɔ A Bɛɛ A A?—Ena Baibol Kɔ A?
Pio kaɛ aā anyaawo, elu ebɔātɛ̄ tɛrɛkpa bie gbɛnɛkpo edo a le tɛɛ̄ ɛŋɛnɛ yube nyɔuwe ama. Lo sɔ pya nɛɛ gaa le biaɛfii loo nɛɛ ba egbi kɔ a bɛɛe wa.
Ena Baibol kɔ a?
Ɛrɛ Kɛ̄ Ekpo Miɔŋɔ Nɛɛ Ina Yira
Baibol kɔ ziī ue a tɔgɛ kɔ a ɛrɛ kɛ̄ ekpo miɔŋɔ nɛɛ a bɛɛ ina yira.
“Bui aa ture nyiɛ loo pya nɛɛbee, loo nwiī nɛɛ, lo a naa ɛrɛ lɔgɔ yerebah. Sɔ̄ ye piogi ye aaloo, a obia kii bu ye esaā; nyɔɔ aba lo dee ama dɛ̄dɛɛ̄ ye ekɛɛrɛ pe aa.”—Le-yɔɔɔ 146:3, 4.
Kere lo nɛɛ a bɛɛ a lee eera e unage ziī dee. Gbaāloo wo, ba naale edap doo kɔ lo nɛɛ ebɛɛ sɔ̄ alaba aa a sah nu alaba bee bɔātɛ̄.—Eklisiastis 2:18, 19.
Ka ue a le kɛ̄ na bee, Baibol muuna kɔ a naa bee lu enɔɔ̄ kɔ miɔŋɔ nɛɛ a bɛɛ aba aba doo pippip.
“A naale bu nɛɛ a kiā etɔgɛ dee ye pah ekaɛtɔ.”—Jeremia 10:23.
A ɛrɛge ziī nɛɛ a le bu ilii sɔ̄ ama a dap bɛɛ leere ni?
Ziī nɛɛ Bari tubobahloo kɔ a bɛɛ
Baibol baatɛ̄ kɔ Bari etubobaloo ziī nɛɛ ebɛɛ lo a lee sa bɔloo edɛrɛ nyiɛ nyɔɔ, lo nɛɛ na Jizɔs Kraist. (Le-yɔɔ 2:6) Jizɔs na Mɛnɛ loo Buɛ̄-mɛnɛ Bari, lo a le ziī bɛbɛɛ ebɛɛ aā li bunyɔɔ a.—Matiu 6:10.
Olo o suge bɛbɛɛ Jizɔs ni? Baibol kɔ pio nu a nua lo ama lu ebɛɛ̄:
“Kuɛ̄ nyɔɔnu loo . . . ekaɛtɔ [Jizɔs] taā a doo [Bari] ɛrɛ saŋ sa bui pe bu dee a; nyɔnɛbee ye saŋ gaa le nwaaba bɛ miā. Leelee a le nɛ pya a ye teera yii bu.”—Le-yɔɔ 2:12.
Taɛ nyaawo na sɔ̄ a a kuu ebiaɛfii a. Mɔmanudɛɛ̄ a le bu Baibol tɔgɛ kɔ Jizɔs bee bɔātɛ̄ bɛɛ aā bu zua 1914, e sɔ̄ sɔ̄ naa binia Buɛ̄-mɛnɛ Bari gaa le lɛɛ dɛ̄dɛɛ̄ bɛbɛɛ miɔŋɔ nɛɛ sa alɛ tɔɔ̄ mmɛ deedee.—Daniel 2:44.
Lo esuā yereloo kɛ̄ o dap yere kpotɛ̄ bɛbɛɛ Jizɔs doo, soosoo buū ekobee ue a kura “Choose to Support God’s Kingdom Now!”