Uvwre ikprughwre ezẹko ra sa obaro na, a samọ ha ihworho sansan mwu ẹrhẹ ere suẹn uvuẹn akpọ na ephian. Omarana, ihworho ne brorhiẹn eghoghanren sekpahen ọrẹ aye ina djẹ.

 Me yi Baibol na ọ tare?

 Baibol na o djephia taghene omẹgbanhon ituakpọ re suẹn o vwo ughwru.

•   “Wu vwa hẹroso emọ irodje yanghene ituakpọ-ọ, ri na ja sabu ha usimi phia-a. Ẹhẹn yen o nie oma, nọ rharhumu riẹ otọre; uvuẹn ẹdẹ ọrana yẹ iroro yi ephian a ghwọghọ.”—Ps. 146:3, 4, ekete ra djokarhọ.

 Ọro suẹn rọ tobọ mai vwo omẹgbanhon ono ji hwu. Habaye, aye i sabu ruie nẹ omamọ owian rẹ aye i wianren, nẹ awọrọ i wian yen riobaro rhọ aye i rhe hwu ne-e.—Ecclesiastes 2:18, 19.

 Itiọrurhomẹmro, Baibol na o djephia taghene a ma ituakpọ nẹ aye i suẹn oma aye-e.

•   “Ọ havwiẹ harẹn onyakpọ rọ nya, nọ kpọ udjoghwẹ onya yen vi-i.”—Jeremiah 10:23.

 O vwo ohworho rọ nọ sabu rhiẹ omamọ osun inyenana?

 Baibol na o djephia taghene Osolobrugwẹ ọ ha i Jesu Kristi mwu ne, ọye yẹ osun ra hẹrosua rọ ji mai vwo omẹgbanhon. (Psalm 2:6) Jesu yẹ Orodje Uvie Osolobrugwẹ, ro rhiẹ igọmẹti ro no sun nẹ odjuwu rhe.—Matthew 6:10.

 Wu ne rhiabọ dede usun i Jesu? Baibol na o dje oborẹ odjẹ ọnana ọ ghanren te:

•   “Are i họghọ rẹn ọmọ na [Jesu Krisit], orhiomara-an, Osolobrugwẹ ọnọ tuekwẹre kpahen are, are ni ne hwu nẹ izede na, fọkime ọ kiki tuekwẹre. Omamerhomẹ ọ havwiẹ harẹn ihworho ri hariẹ ru ekete ra zẹrua.”—Ps. 2:12.

 Vwana yẹ ọke re ne brorhiẹn. Aruẹmẹrẹn i Baibol o djephia taghene Jesu ọ tuẹn usun rhọ ẹgbukpe 1914, habaye Uvie Osolobrugwẹ ono tiẹ usun ituakpọ ephian nie phẹrẹkpẹ.—Daniel 2:44.

 Wu rha guọlọ yono rhọ kpahen oborẹ wu ne ru hobọtua usun i Jesu, se urhomu-ẹmro na “Choose to Support God’s Kingdom Now!”