Gentecunaca shuj alli mandajtami agllana can.

 ¿Caimantaca Bibliaca imatataj nin?

 Bibliapica cai allpapi mandajcuna mana tucuita rurai tucushcatami ricuchin.

•    “Mandajcunapica ama shunguta churaichu. Huañujlla runacunapipish ama shunguta churaichu. Paicunapica quishpirinaca mana tiyanchu. Paipaj samai anchujpica allpaman tigranllami. Chai punllallatajmi pai imata yuyarishcacunapish chingarin” (Salmo 146:3, 4).

 Tucui mandajcunami alli cashpapish huañunllacuna. Paicunaca alli obracunata rurashca cashpapish catij mandajcuna chaillatataj rurashpa catina cashcataca mana decidi tucuncunachu (Eclesiastés 2:18, 19).

 Bibliapica gentecuna shujtajcunata mandangapaj rurashca cashcataca mana yachachinchu.

•    “Pipish quiquin causaitaca mana mandai tucunchu” (Jeremías 10:23).

 ¿Cunan punllacunapica shuj alli mandaj tiyanchu?

 Bibliapica shuj alli mandajta Dios agllashcatami huillan. Paica Jesucristomi can (Salmo 2:6). Jesucristoca Diospaj Gobiernopi mandajmi can. Chai Gobiernoca jahua pachamantami mandacun (Mateo 6:10).

 ¿Canta Jesús mandachun agllanguimanchu? Bibliapica imamanta cai decisionta agllana cashcatami ricuchin:

•    ‘Pai pꞌiñarishpa cancunapaj causaita ama chingachichun paipaj churi [Jesucristota] alli nichij. Pai pꞌiñarishpaca mana saquingachu. Paipi shunguta churajcunaca cushichishcami canga’ (Salmo 2:12).

 Cunanmi pi ñucanchijta mandachun munashcataca decidina canchij. Bibliapi tiyaj profeciacunapi ricuchishca shinaca Jesusca 1914 huatamantami mandai callarirca. Shinallataj Bibliapica cai Allpapi tiyaj mandajcunapaj randi Diospaj Gobierno mandana cashcatami ricuchin (Daniel 2:44).

 Mandaj Jesusta apoyangapaj imata rurana cashcata yachasha nishpaca “Diospaj Gobiernota cunanmanta apoyashunchij” nishca temata ricui.