Batho ba lokela ho etsa qeto ea bohlokoa ea hore na ba tla khetha mang.

 Bibele e re’ng ka taba ee?

 Bibele e bua ka ntho eo baeta-pele ba batho ba sa khoneng ho e etsa.

•   “Le se ke la tšepa likhosana kapa motho hobane a ke ke a le pholosa. Ha a khaotsa ho hema, o khutlela leroleng. Ho tloha ka nako eo, o khaotsa ho nahana.”—Pesaleme ea 146:3, 4, naletsana.

 Esita le baeta-pele ba ipabolang baa shoa qetellong. Ho feta moo, ha baa kholiseha hore na ba tlang ka mor’a bona ba tla tsoellisa pele mesebetsi ea bona e metle kapa che.—Moeklesia 2:18, 19.

 ’Nete ke hore Bibele e re batho ba ne ba sa etsetsoa ho ipusa.

•   “Motho ha a khone ho laola mehato ea hae.”—Jeremia 10:23.

 Na ho na le motho ea ka busang hantle mehleng ee?

 Bibele e re hlalosetsa hore Molimo o khethile moeta-pele ea tšepahalang le eo ho ke keng ha e-ba le moeta-pele leha e le ofe ea ka tšoanang le eena e leng Jesu Kreste. (Pesaleme ea 2:6) Jesu ke Morena oa ’Muso oa Molimo e leng ’muso o busang o le leholimong.—Matheu 6:10.

 Na u tla khetha hore Jesu e be moeta-pele oa hao? Bibele ea bontša hore na ke hobane’ng ha u lokela ho khetha ka nepo:

•   “Hlomphang mora [Jesu Kreste], ho seng joalo Molimo o tla halefa ebe lea bolaoa, le tlosoa tseleng hobane o khona ho halefa kapele. Ho thaba bohle ba balehelang ho eena.”—Pesaleme ea 2:12.

 Ena ke nako ea hore u etse qeto. Boprofeta ba Bibele bo bontša hore Jesu o qalile ho busa ka selemo sa 1914 le hore haufinyane ’Muso oa Molimo o tla nkela mebuso ea batho sebaka.—Daniele 2:44.

 Bala sehlooho se reng “Tšehetsa Bobusi ba Molimo Hona Joale” e le hore u ithute haholoanyane hore na u ka tšehetsa bobusi ba Jesu joang.