Náa semanas rí na̱ʼkha̱ náa mbaʼa país dí rígá náa numbaaʼ, xa̱bu̱ mbaʼyóoʼ muraʼwíí rí muni mu mugíiʼ mbáa mu maʼtáñajunʼ.

 Ndiéjuunʼ eʼthí náa Biblia rá.

 Náa Biblia naʼthí mbóoʼ dí xáʼngu̱u̱n gunimbaníí xa̱bu̱ ñajunʼ bi̱ kúwá náa numbaaʼ.

•   “Xúgíwánʼ a̱jkia̱la náa xa̱bu̱ bi̱ guáʼdáá numún, ni má náa xa̱bu̱ numbaaʼ, numuu dí ikhiin xáʼngu̱u̱n gúni̱ káwáanʼla. Nagájnáa Espíritu ndrígóo, ikhaa natanga̱a̱ naʼnila ku̱ba̱ʼ; mbiʼi rúʼko̱ nándáa dí endxaʼwamínáʼ” (Salmo 146:3, 4, nota).

 Maski ajndu guaʼdáá tsiakii xúgíinʼ xa̱bu̱ ñajunʼ nakháñún. Maski ajndu ikhiin nini dí májánʼ, mú rígi̱ xándoo gaʼni dí bi̱ gatri̱ʼi̱i̱n nda̱wa̱á muni ikháá kayuuʼ xó má nini̱ ikhiin (Eclesiastés 2:18, 19).

 Náa Biblia naʼthí dí na̱nguá nigumawáanʼ mu muʼtáñajumijnálú.

•   “Xa̱bu̱ numbaaʼ na̱nguá kaʼyoo maʼtañajuminaʼ. Asndu má rakaʼyoo maʼthí xú káʼnii maxtáa” (Jeremías 10:23).

 Lá xtáa mbáa xa̱bu̱ ñajunʼ xúgi̱ bi̱ majmaa mbayáa ikhulú májánʼ ráʼ.

 Náa Biblia naʼthí dí Dios nigíiʼ Jesucristo mu maʼtáñajunʼ mbáa bi̱ nijuiʼsngáá májánʼ ga̱jma̱a̱ bi̱ gajkhun mambáyúlú (Salmo 2:6). Ikhaa nindxu̱u̱ Rey náa Reino ndrígóo Dios, mbáa xa̱bu̱ ñajunʼ bi̱ xtáa mekhuíí ga̱jma̱a̱ asndu ikhí gáʼtañajunʼ (Mateo 6:10).

 Lá matraʼwíí dí maʼtáñajuáanʼ Jesús ikháán ráʼ. Náa Biblia naʼthí ndíjkha dí gíʼdoo numuu matani̱ rígi̱:

•   “Guyamajkuíí ada̱ [Jesucristo], á mu na̱nguá eni̱, Dios makiʼnáa kaʼyála ga̱jma̱a̱ makhañála náa kamba̱a̱, numuu rí mbá nacha̱ gákasngañuuʼ. ¡Gagi kúwi̱i̱n xúgíinʼ bi̱ numbayúmíjná náa ikhaa!” (Salmo 2:12).

 Xúgi̱ ndayóoʼ matraʼwíí mbáa dí matani̱. Profecía dí na̱ʼkha̱ náa Biblia nasngájma dí Jesús nigi̱ʼdu̱u̱ niʼtáñajunʼ nákha tsiguʼ 1914. Ma̱ngaa náa Biblia nasngájmaa dí Reino ndrígóo Dios na̱nguá ma mbayuuʼ dí maʼnigámbíin xa̱bu̱ ñajunʼ bi̱ kúwá náa numbaaʼ (Daniel 2:44).

 Á mu nandaaʼ ma̱ta̱ya̱a̱ xóo gándoo gátambáyíí Jesús, atraxnuu artículo rígi̱ “Gumbáyii Reino ndrígóo Dios xúgi̱”.