AMULANGILE!
Ino Nguni Mweendelezi Ngomuyoosala?—Ino Bbaibbele Lyaamba Nzi?
Bantu bapanga zyakusala ziyandika kapati kujatikizya beendelezi mbobayoosala.
Ino Bbaibbele lyaamba nzi?
Beendelezi bantunsi balalezya
Bbaibbele lilakwaamba kulezya nkobajisi beendelezi boonse bantunsi.
“Mutasyomi bami pe naba mwanaamuntu uutakonzyi kuleta lufwutuko. Muuya wakwe ulazwa, eelyo walo ulapiluka kubulongo; mubuzuba mbubonya oobo nzyayeeya zyoonse zilamana.”—Intembauzyo 146:3, 4.
Naba mweendelezi weelela kapati bumwi buzuba uyoofwa. Kuyungizya waawo, kunyina cisinizyo cakuti milimo yabo mibotu iyoozumananwa abaabo ibayoonjila mubusena bwabo.—Mukambausi 2:18, 19.
Bwini mbwakuti, Bbaibbele lyaamba kuti bantu kunyina nobakonzya kulyeendelezya.
“Muntu weenda tapedwe nguzu zyakusololela noziba ntaamu zyakwe.”—Jeremiya 10:23.
Sena kuli muntu uukonzya kuba mweendelezi mubotu mazuba aano?
Mweendelezi iwakazumizyigwa a Leza
Bbaibbele lilapandulula kuti Leza wakabikka mweendelezi weelela kwiinda boonse alimwi uusyomeka: Jesu Kristo. (Intembauzyo 2:6) Jesu Mwami wa Bwami bwa Leza, imfwulumende yeendelezya kuzwa kujulu.—Matayo 6:10
Sena muyoobuzumina bweendelezi bwa Jesu? Bbaibbele lilatondezya kaambo mubuzyo ooyu ncouyandika kapati:
“Amumulemeke mwana, buyo-buyo Leza ulakalala. Aboobo mulaloba munzila, nkaambo bukali bwakwe bubuka buyo. Balikkomene aabo boonse ibayuba mulinguwe.”—Intembauzyo 2:12.
Ecino nciindi cakuti musale. Businsimi bwamu Bbaibbele butondezya kuti Jesu wakatalika kulela mumwaka wa 1914 akuti lino-lino Bwami bwa Leza bulanjila mubusena bwamfwulumende zyoonse zyabantu.—Daniele 2:44.
Kutegwa mwiiye zinji kujatikizya mbomukonzya kugwasyilizya bweendelezi bwa Jesu, amubale cibalo cakuti “Amubugwasyilizye Bwami bwa Leza Lino!”