Ja kristyano tʼilani ay jas oj tsaʼe: maʼ wa skʼana oj ajukyuj mandar.

 ¿Jasa wa xyala ja Biblia?

 Ja Biblia wa xyala ja jas mi xlajxiyujile skʼulajel spetsanil ja gobyernoʼik bʼa luʼumi.

•    «Moka jipa kʼujolex b’a olomalik sok cha mini b’a jun winik, yujni mi xbʼobʼ yiʼejan koltajel. Wa x-el ja yikʼi, ja yeʼn wa xpax tsʼubʼil luʼum; ja kʼakʼu jaw ti tikʼan wa xchʼak ja spensari» (Salmo 146:3, 4).

 Spetsanil ja mandaranumik wa xchʼak chamuke, chikan janekʼ chapjelal yiʼoje. Chomajkil, anima skʼulane jastik bʼa lek, mini xbʼobʼ jip jkʼujoltik ke ja matik oj slokʼolukekan oj cha skʼuluke ja jastik jaw (Eclesiastés 2:18, 19).

 Ja yuj ja Biblia wa xcholo ke ja kristyanoʼik mi kʼulajiye bʼa yeʼnta oj ya sbʼaje mandar.

•    «Sok mini ja winik wan bʼejyeli wa sbʼajin oj stoj ja sbʼeji» (Jeremías 10:23).

 Ja bʼa jtyempotik, ¿oj maʼ bʼobʼ ajyuk jun lekil mandaranum?

 Ja Biblia wa xcholo ke ja Dyos yaʼunejxa och mandaranum ja Jesukristo, bʼa yeʼnani ja mas jel chapan sok wa xbʼobʼ jipxuk kʼujolal (Salmo 2:6). Yeʼnani ja Rey ja bʼa sGobyerno ja Dyos, jun gobyerno tey bʼa satkʼinal sok ti wan yajel mandar tiw (Mateo 6:10).

 ¿Oj maʼ atsaʼ ja Jesús bʼa oj yaʼa mandar ja weʼn? Ja Biblia wa xchiktes jas yuj tʼilan tsajel ja jaw:

•    «Toyowik ja uninal [Jesukristo]; ta mikʼa, ja Dyosi oj tajkuk sok jaxa weʼnlexi ti oj chamanik bʼa bʼej, yujni wego wa xtajki. ¡Jel gusto wa x-ajyiye spetsanil ja matik wa sleʼawe skoltajel bʼa yeʼn!» (Salmo 2:12).

 Ja wego jani ja styempoʼil bʼa stsajel jas skʼulajel. Soka jastik alubʼalxakan ja bʼa Biblia, ja Jesús kʼe ya mandar bʼa 1914. Chomajkil, wa xyala ke mojanxa ja sGobyerno ja Dyos oj slokʼolukan spetsanil ja gobyernoʼik bʼa luʼumi (Daniel 2:44).

 Ta waxa kʼana oja naʼ jastal oj bʼobʼa koltay ja sgobyerno ja Jesús, kʼuman ja artikulo «La ajyukotik bʼa sparte ja sGobyerno ja Dyos man wego».