Vuru gu bete aposo du kumbatayo, sia abazogo nika manga rogo dungu aringara rogo zegino dunduko. Aboro namanga nyanyakipa siapai tipa gu barumbatayo i nika sia ni.

 Ginipai Baibiri Ayugoho?

 Baibiri nayugopa gu zanga rengbanapai du agu abarumbatayo nga wiri aboro na ni.

•   “Ka oni nikída nga kuti abarumbatayo ya, kuti wiri boro, nga gu ni adu nga undahe be ni a ya. Ho ongani niguari ni, ni ki karaga tini ku rogo gani sende; ti kina gu uru re gani berã pa apai ki nyasi.”—Atambuahe 146:3, 4.

 Zavura agu abarumbatayo du na bete rengbanapai nakpi akpi niyangaraha. Kurigure, i arengbanga ka sa agu aboro nika du fuo yo i ndu kumbatayo na gu gayo wene asunge dunduko i amangaha te.—Batungusipai 2:18, 19.

 Baibiri nayugo gu rengo duho nga, i aakusanga aboro i nizogo tiyo te.

•   “Gu boro nata, pa ruga gani apai si rogo ni yo te.”—Yeremaya 10:23.

 Ya mo boro ho rengbe kadu ni wene barumbatayo areme?

 Baibiri nayugo gupai ziazia nga Mbori ima sia gu bawene barumbatayo du na rengbanapai na rengbe aboro ka kido kutini: Yesu Kristo. (Atambuahe 2:6) Yesu nga Bakindo nga ga ga Mbori Kindo, nga gu zogarago du ngbangbaturũ yo.—Matayo 6:10.

 Ya mo mo asia Yesu ni gamo barumbatayo? Baibiri nayugo ndu gupai du gi sanahe re ti ni na nyanyakipaha:

•   “Oni údi wiri [Yesu Kristo] ni rengo, ko ka zinga, oni ki kpiki gene; bambiko gako zinga narunguda ni ipo. Aboro maku nga agu yo dunduko nafu tiyo ku be ko.”—Atambuahe 2:12.

 Awere nga regbo mo mangi gamo siapai. Gu sangbanebi nga ga Baibiri nayugo gupai nga Yesu atona zogarago rogo gu garã nangia 1914 na barambeda ga Mbori Kindo nika diaba agu azogarago dunduko nga ga wiri aboro.—Daniere 2:44.

 Tipa ka wirika kura apai tipa wai rengbe mo ka songoda Yesu ni gamo barumbatayo, mo gedi gu kekeapai nga “Mo Sia ka Songoda ga Mbori Kindo Awere!”