Le Dzoɖa, February 13, 2023 dzia, Dɔléle Nu Tsitsi Kple Mɔxexe Ðe Enu Dɔwɔƒea ka nya ta tso sɔhɛwo ƒe susumedɔwo ŋu le Amerika. Wogblɔ le nyatakakaa me be sekɛndrisukuvi (lycée) 40 le alafa me kple edzivɔ léa blanui enuenu eye mɔkpɔkpɔ buna ɖe wo.

 Ðɔkta Kathleen Ethier si nye amegã aɖe le Dɔléle Nu Tsitsi Kple Mɔxexe Ðe Enu Dɔwɔƒea gblɔ be: “Togbɔ be sɔhɛ siwo susumedɔ ɖea fu na ƒe xexlẽme nɔ dzidzim ɖe edzi le ƒe 10 siwo va yi me hãa, ɖetugbui gbogbo aɖewo va le susumedɔ lém fifia wu tsã, eye wo dometɔ geɖe dina be yewoawu yewo ɖokui, alo wotenɛ kpɔ gɔ̃ hã.”

 Woka nya ta be:

•   Wodɔa ɖetugbui 14 le alafa me gbɔ sesẽe. Ðɔkta Ethier gblɔ be: “Esia ɖe fu ŋutɔ, elabe efia be le ɖetugbui 10 ɖe sia ɖe si nènya domea, wodɔ wo dometɔ ɖeka alo esi wu ema gbɔ sesẽe.”

•   Ðetugbui 30 le alafa me dina vevie be yewoawu yewo ɖokui.

•   Enuenua, ɖetugbui 57 le alafa me léa blanui vevie alo mɔkpɔkpɔ buna ɖe wo.

 Nyatakaka siawo wɔ nublanui ŋutɔ. Sɔhɛmenɔɣie míekpɔa mɔ be ame nakpɔ dzidzɔ wu. Nu kae akpe ɖe sɔhɛwo ŋu be woanɔ te ɖe kuxi siwo me wotona egbea nu? Nya kae Biblia gblɔ?

Biblia ɖo aɖaŋu siwo akpe ɖe sɔhɛwo ŋu

 Biblia gblɔ nɔnɔme wɔnublanui siwo me tom míele egbea ŋu nya ɖi. Eye wòyɔ míaƒe ŋkekea be “ɣeyiɣi sesẽ siwo me nɔnɔ asesẽ.” (2 Timoteo 3:1-5) Gake Biblia ɖo aɖaŋu nyui siwo gale kpekpem ɖe sɔhɛ miliɔn geɖe ŋu le xexea me godoo be woanɔ te ɖe kuxi siwo me tom wolea nu. Aɖaŋuɖoɖo mawo dometɔ aɖewo dze le nyati siwo gbɔna me.

•   Medi Be Maku—Ðe Biblia Ate Ŋu Akpe Ðe Ŋunye Ne Ele Wɔwɔm Nam Be Mawu Ðokuinyea?

•   Nu Ka Tae Maganɔ Agbe Ðo?

•   Aleke Mawɔ Aƒo Asa Na Nuŋububu Si Mesɔ O?

•   Aleke Mawɔ Aɖu Dzimaɖitsitsi Dzi?

•   Aleke Mawɔ Aɖu Nye Seselelãmewo Dzi?

•   Àte Ŋu Adzudzɔ Blanuiléle (nutata ƒe video)

•   Nu Kae Mawɔ Ne Wowɔa Anyra Le Ŋunye?

•   Nɔ Te Ðe Anyrawɔlawo Nu Kɔmadamadae (nutata ƒe video)

•   Nu Kae Mawɔ Ne Wotsɔa Gbɔdɔnyawo Ðea Fu Nam?

•   Nu Kae Wòle Be Manya Tso Gbɔdɔnuwɔwɔ Ðe Ame Ŋuti Ŋu?​—Akpa 1: Nu Siwo Ŋu Nànɔ Ŋudzɔ Ðo

•   Nu Kae Wòle Be Manya Tso Gbɔdɔnuwɔwɔ Ðe Ame Ŋuti Ŋu?​—Akpa 2: Ale Si Nàwɔ Ahaya

Biblia ɖo aɖaŋu siwo akpe ɖe dzilawo ŋu

 Biblia ɖo aɖaŋu nyui na dzilawo ku ɖe ale si woawɔ akpe ɖe wo vi sɔhɛwo ŋu be woanɔ te ɖe kuxiwo nu. Aɖaŋuɖoɖo mawo dometɔ aɖewo dze le nyati siwo gbɔna me.

•   Sɔhɛwo Ƒe Blanuiléledɔ—Nu Ka Gbɔe Wotso? Nu Kae Akpe Ðe Wo Ŋu?

•   Nu Si Nàwɔ Ne Nu Te Ðe Viwò Nyɔnuvi Dzi

•   Nu Kae Mawɔ Ne Wowɔa Anyra Le Vinye Ŋu?

•   Ne Viwò Ƒewuivi Wɔa Nu Vevi Eɖokui

•   Ðeviwo Kple Internet Dzi Hahoo Kadodowo—Akpa 1: Ðe Wòle Be Vinye Nazã Internet Dzi Hahoo Kadodowoa?

•   Ðeviwo Kple Internet Dzi Hahoo Kadodowo—Akpa 2: Fia Viwò Ale Si Wòazã Internet Dzi Hahoo Kadodowo Nyuie

•   Dzeɖoɖo Tso Asitelefon Dzi Amamaɖenuwo Ŋu Kple Viwò