¡YOM CHɅN YɅXɅL LA CO!
Juntiquil doctor ti Estados Unidos tsiʼ yʌlʌ chaʼan jiñi redes sociales miʼ mejlel i wen ticʼlan jiñi xcolelob | ¿Chuqui miʼ yʌl jiñi Biblia?
Ti 23 de mayo chaʼan 2023, juntiquil doctor ti Estados Unidos tsiʼ yʌlʌ chaʼan jiñi redes sociales woliʼ wen ticʼlan jiñi xcolelob.
«Anquese jiñi redes sociales i cʼʌjñibalʌch i chaʼañob jiñi alobob yicʼot jiñi xcolelob, añʌch chuqui tac miʼ pʌs jaʼel chaʼan jiñi redes sociales miʼ mejlel i ticʼlʌbeñob i pensar i mach tijicñayix miʼ yubiñob i bʌ» (Las redes sociales y la salud mental de los jóvenes: Informe del director general de Salud Pública de Estados Unidos], 2023).
Jiñi informe miʼ yʌl chaʼan wen wocolʌch chuqui woli bʌ i yujtel:
Jiñi xcolelob añoʼ bʌ 12 cʼʌlʌl ti 15 i jabilelob «ñumen bʌ ti uxpʼejl hora miʼ cʼʌñob jiñi redes sociales ti jujumpʼejl qʼuin, miʼ mejlel i ñumen ticʼlʌbeñob i pensar, i muʼto mejlel i tajob despresión yicʼot anciedad».
Ti jiñi xcolelob añoʼ bʌ 14 i jabilelob «tsaʼ qʼuejli chaʼan jiñi muʼ bʌ i wen cʼʌñob redes sociales maʼañix miʼ wen mejlelob ti wʌyel, miʼ subentelob tsucu tʼan, mach tijicñayic miʼ yubiñob i bʌ yicʼot i bʌcʼtal, maʼañix i cʼʌjñibal miʼ yubiñob i bʌ i wen chʼijyemob, ñumento ti jiñi xchʼocob».
¿Chuqui miʼ mejlel i mel jiñi tatʌlob chaʼan miʼ cʌntañob i yalobilob ti ili wocol woli bʌ i yujtel? Jiñi Biblia miʼ yʌcʼ wen tac bʌ ticʼojel.
Muʼ bʌ mejlel i mel jiñi tatʌlob
Mach a mel a pensar. Ñaʼtan chuqui tac ti wocol miʼ mejlel i taj a walobil mi an i chaʼan jiñi redes sociales, i cheʼ bajcheʼ jiñi miʼ mejlel a ñaʼtan mi mucʼʌch caj a wʌqʼuen i cʼʌn.
Texto: «Cʌntesan alʌlob ti jini bij yom bʌ miʼ xʌñob majlel» (Proverbios 22:6).
Mi a womto a ñumen cʌn, pejcan jiñi tema «¿Yom ba miʼ cʼʌñob redes sociales jiñi calobilob?»
Mi tsaʼ sube a walobil chaʼan mucʼʌch mejlel i cʼʌn jiñi redes sociales, cʌntan chaʼan maʼañic miʼ taj wocol i qʼuele chuqui tac miʼ mel ti internet. ¿Bajcheʼ miʼ mejlel a mel?
Cʌntan chaʼan maʼañic miʼ qʼuel mach bʌ weñic. Pʌsben jiñi a walobil bajcheʼ miʼ mejlel i cʌn chuqui mach bʌ weñic muʼ bʌ mejlel i ticʼlan yicʼot chaʼan maʼañic miʼ qʼuel.
Texto: «Jiñi tsʼiʼlel, baqui jach bʌ bibiʼlel yicʼot i wen mulʌntel chubʌʼan mach yomic mi laʼ wis al [...]. Cheʼ jaʼel, mach laʼ pʌs quisintic jax bʌ laʼ melbal, mach laʼ wʌl tʼan tac mach bʌ añic i sujmlel, mach laʼ chaʼlen alas tʼan yicʼot bʌ tsucu tʼan» (Efesios 5:3, 4).
Mi caj a taj wen tac bʌ ticʼojel yaʼ ti artículo «Cʌntesan jiñi a walobil chaʼan miʼ cʼʌn ti wen.”
Pʼisbil jach bajcheʼ yom maʼ wʌqʼuen i cʼʌn. Suben a walobil bajcheʼ hora yicʼot bajcheʼ jalel miʼ mejlel i cʼʌn jiñi redes sociales.
exto: «Yom wen tsajaletla chaʼan mach cheʼeticla bajcheʼ jiñi tontojoʼ bʌ, cheʼ yometla bajcheʼ jiñi añoʼ bʌ i ñaʼtʌbal, cheʼ mi laʼ cʼʌn ti wen jiñi i yorajlel am bʌ laʼ chaʼan» (Efesios 5:15, 16).
Qʼuele a wicʼot a walobil jiñi video Yom tsajilet cheʼ maʼ cʼʌn jiñi Internet chaʼan maʼ coltan i chʼʌmben i sujm chucoch pʼisbil jach yom miʼ cʼʌn jiñi redes sociales.