Сала 2023, 23 Гӧлане мәрьве щабдар бона медисинайе Дәԝләтед Йәкбуйида әʹлам кьр ԝәки малпәред сосйал чьԛас хьраб һʹӧкӧм дьбьн сәр щаһьла.

•   «Рʹаст ә, малпәред сосйал щарна дькарьн зарʹ у щаһьларʹа кʹаре жи биньн, ле гәләк нишанед ве йәке һәнә кӧ малпәред сосйал зийане дьдьнә сьһʹәт-ԛәԝата психики у һʹалхԝәшийа зарʹ у щаһьла».—Social Media and Youth Mental Health: The U.S. Surgeon General’s Advisory, 2023..

 Лекʹолинкьрьн данә кʹьфше кӧ чь мәʹни һәнә, ԝәки фәсал бьн.

•   Щаһьлед 12 һʹәта 15 сали «йед кӧ һәр рʹож 3 сьһʹәта зедәтьр малпәред сосйалида дәрбаз дькьн, дӧ щар зедәтьр рʹасти хофе тен, кӧ дькарьн сьһʹәт-ԛәԝата психикида зьраре бьстиньн, нава чь дькʹәвә депресийа у дьлтәнги».

•   Щаһьлед 14 сали, йед кӧ «бь зедәйи малпәред сосйалива гьредайи нә, хәԝа хԝә һьлнадьн, онлайнеда рʹасти беһӧрмәткьрьне тен, жь бәжн-бала хԝә нәрʹази дьбьн, хԝә бекер һʹәсаб дькьн, у нишанед депресийайе бал ԝан һе зедә дьбьн, илаһи щәм кәчʹька».

 Де-бав ча дькарьн зарʹед хԝә бьпʹарезьн? Кʹьтеба Пироз ширәтед керһати дьдә.

 Һаш жь зарʹед хԝә һәбьн. Чаԝа де-бав, бьфькьрьн дәрһәԛа хофе у сафи кьн, изьне бьдьнә зарʹед хԝә кӧ малпәред сосйал бьдьнә хәбате йан на.

•   Принсипа Кʹьтеба Пироз: «Зарʹотийеда рʹийа рʹаст һин бькә» (Мәтʹәлок 22:6).

•   Сәва кӧ һе зедә пебьһʹәсьн, бьхуньн готар «Гәло Лазьм ә Зарʹа Мьн Малпәред Сосйали Бьдә Хәбате?»

 Һәрге һун изьне дьдьнә зарʹед хԝә, ԝәки малпәред сосйали бьдьнә хәбате, һьлдьн һʹәсаб әв хоф, рʹасти кʹижана әԝана дькарьн бен, у һаш жь ԝе йәке һәбьн кӧ әԝана онлайнеда чь дькьн. Ле чаԝа?

 Зарʹед хԝә жь тьштед хьраб, йед кӧ интернетеда һәнә, бьпʹарезьн. Зарʹед хԝә һин бькьн хьрабийе интернетеда тедәрхьн у хԝә жь ве дур бьгьрьн.

•   Принсипа Кʹьтеба Пироз: «Ле һʹәта наве ԛавийе у һәр һʹәрамийе, йан тьмайе жи гәрәке нава ԝәда нәйе һьлдане, . . . Ӧса жи готьнед бемәʹрифәти, йан бефәʹми, йан һʹәнәкед ԛәлпе хьраб» (Әфәси 5:3, 4).

•   Һун дькарьн ширәтед керһати бьхуньн готареда «Зарʹед Хԝә Һин кьн кӧ Малпәред Сосйали Рʹаст Бьдьнә Хәбате».

 Синора дайньн. Мәсәлә, сафи кьн кʹәнге у чьԛас ԝәʹдә зарʹа ԝә дькарә малпәред сосйалида дәрбаз кә.

•   Принсипа Кʹьтеба Пироз: «Аԝа бьньһерʹьн кӧ һун ньге хԝә фәсал бавежьн, . . . мина сәрԝахта. Дәст бьдьнә бәр ԝәхт» (Әфәси 5:15, 16).

•   Һун дькарьн бьдьнә хәбате видеойа анимасийоне Малпәред Сосйал бь Билани Бьдә Хәбате сәва кӧ али зарʹа хԝә бькьн ԝәки фәʹм кә, кӧ чьма фәрз ә синора дайньн.