Kum 2023, May 23 khân, United States-a hrisêlna lama mi thiamte chuan social media-in ṭhalai tam tak chungah a chhe zâwngin nghawng a nei tih an vaukhân a.

•   “Social media hi naupang leh ṭhalai ṭhenkhatin eng emaw chen an hlâwkpui laiin, social media hian an rilru lam leh taksa lam hrisêlna chungah pawi a khawih thui hle thei bawk tih finfiahna tam tak a awm a ni.”—Social Media and Youth Mental Health: The U.S. Surgeon General’s Advisory, 2023.

 Chu zir chianna chuan kan fîmkhur a ngaih nachhan pawh a târ lang bawk.

•   Kum 12 aṭanga 15 inkâr tleirâwlho, “ni khata dârkâr 3 aia tam social media hmang ṭhînte chuan lungkhamna leh rilru hahna nasa tak pawh tiamin, rilru lam hrisêl lohna an nei nasa lehzual a ni.”

•   Kum 14 chung lam tleirâwl chho zînga “social media hmang nasa zualte chuan mut kham lohna te, online tihbuaina te, hmêl lan ṭhat lohna te, hlutna nei lo nia inhriatna te, leh rilru hahna nasa takte an nei a, chûngte chu tlangvâlte aiin nulate’n an tuar nasa zâwk a ni.”

 Engtin nge nu leh pate’n an fate chu chûng hlauhawm laka an vênhim theih ang? Bible chuan thurâwn ṭangkai takte min pe a ni.

 Hriatpui rawh. Nu leh pa in nih angin, chûng hlauhawmte chu ngaihtuahin i fate social media i hmantîr dâwn leh dâwn loh chungchângah thu tlûkna siam ang che.

•   Bible thu bul: “Naupang chu a kalna âwm kawngah chuan zirtîr ula, a upat hun pawhin a thlah lo vang.”—Thufingte 22:6.

•   Hriat belh nân, “Should My Child Use Social Media?” tih thuziak hi chhiar ang che.

 I fate chu social media hman i phal a nih chuan, hlauhawm awm theite laka harhvâng taka awmin, online-a an thiltihte chu hriatpui ang che. Engtin nge?

 I fa chu thu ṭha lote lakah vênghim rawh. I fa chu thu ṭha lote hre thiam tûr leh chûngte pumpelh tûrin zirtîr ang che.

•   Bible thu bul: “Nimahsela mi thianghlimte tiha mawi âwm rêngin, inngaih leh bawlhhlawh zawng zawng, duhâmna nên . . . lamin awm suh se; zahmawh te, thu lawi lo sawi te, fiamthute pawh, chûng chu a mawi lo a ni.”—Ephesi 5:3, 4.

•   Thurâwn ṭangkai tak atân, “Teaching Your Teenager Social Media Safety” tih thuziak hi chhiar ang che.

 Chin tâwk siam rawh. Entîr nân, i fain social media a hman hun tûr leh hman chen tûr chungchângah dân siam ang che.

•   Bible thu bul: “Mi fingte anga awm zâwkin, in awm dânah fîmkhur rawh u; . . remchânnate lei zêl rawh u.”—Ephesi 5:15, 16.

•   I fate’n chin tâwk siam a ṭûl chhan an hriatthiam theih nân, he whiteboard animation Social-Network Hmanna Kawngah Fîmkhur Thiam Rawh tih hi hmang ang che.