Lamande kali 23 May 2023, mukulwana wa za makete wa mu nkaanda ya Amerika abalemusi bantu za kusebelisa mawebbusaiti mu kukweete kuletela bukaabo bubi bahya.

•   “Initi kuti kusebelisa mawebbusaiti kuwoola kutusa bahwile ni bahya, kwiina ziingi zitondeza kuti kusebelisa mawebbusaiti kuwoola kuleta bukaabo ku makete a mumunahano ni maikuto a bahwile ni bahya.”—Social Media and Youth Mental Health: The U.S. Surgeon General’s Advisory, 2023.

 Indaba zicilila zibatatubwa zitondeza ibaka hatuswanela kubilela.

•   Bahwile ba zilimo 12 kutwaala 15 “bahinda inako ikasika ha mahora ootatwe mwi zuba ni basebelisa iwebbusaiti beena ahulu mu bukaabo bwa kukatazwa matuku a mumunahano mane bulyo ni zisupo za kulizuwa bubi ni ntongosi ziingi.”

•   Bahwile ba zilimo 14, “basebelisa ahulu mawebbusaiti ka bawaani inako hande ya kulala, kukatazwa he intaneti, kusakondoloka ku mubili, kulizuwa ahulu kusaaba ba butokwa, ni maikuto a kulizuwa ahulu bubi zinjihite ahulu ku bakazana kuzamba ku baswisu.”

 Bazaazi bawoola kusileleza bule baana baabo koobu bukaabo? IBibele iha inkelezo iwoola kutusa.

 Mupange cimwi. Ca kuba bazaazi, muhupulisise ha ziintu zibi ziwoola kuzwa mwateni kuzwaho mupange inkatulo haiba mwaanenu uwoola kulitusisa mawebbusaiti kapa nee.

•   Cikuka ca mwi Bibele: “Lute mwaana inzila yaa swanela kuyenda kuyili.”—Inguli 22:6, Indaba za kuunsi.

•   Kuti mulitute ziingi, mubale indaba yahe webbusaiti icokuti “Should My Child Use Social Media?”

 Haiba ni muzuminina mwaanenu kusebelisa iwebbusaiti, mutokomele ziintu ziwoola kuletisa bukaabo cee nako iswana mwiizibe za panga ciwiina he intaneti. Muwoola kupanga bule?

 Musileleze mwaanenu ku ziintu ziwoola ku muletela bukaabo. Mulute mwaanenu kulemuha ni kulihambusa ku ziintu zifosahele.

•   Cikuka ca mwi Bibele: “Muyendelo wa busahi ni mufuta woonse weekwe kapa kusalitumelela, nangati bulyo kuwambwa saanzi ziwambwa mukati keenu, . . . nangati muyendelo uswabisa kapa ziwambo za buholo kapa isheya lya ziswabisa.”—Baefese 5:3, 4.

•   Kuti muwaane ziintu zimwi zitusa, mubale indaba yahe webbusaiti icokuti “Teaching Your Teenager Social Media Safety.”

 Mutome inako. Ca mutala, muhe mulawo wee nako ya swanela kuhinda naa sebelisa iwebbusaiti.

•   Cikuka ca mwi Bibele: “mutokomele ahulu mumuyendela kuti. . . (mube) sina bantu batali, ni mulitusisa hande inako yeenu.”—Baefese 5:15, 16.

•   Mulitusise ividiyo ya tudoli tuswanisa icokuti Muitusise Hande Mawebusaiti A Kulumelana ka Ona Litaba kutusa mwaanenu kusebelisa hande iwebbusaiti.