Tapu 23 mei 2023, wan heihei sma di abi fu du nanga a gosontu fu sma na ini Amerkankondre ben warskow sma taki social media abi trakru bakapisi gi someni yonguwan.

•   „Social media kan abi bun bakapisi gi someni pikin-nengre nanga yonguwan, ma buweisi de di e sori tu taki a kan meki den du sani di kan tyari takru bakapisi gi den frustan èn di kan meki taki den no e firi bun.”​—Social Media and Youth Mental Health: The U.S. Surgeon General’s Advisory, 2023.

 Na ini a raportu den ben skrifi san na den reide fu san ede den e biribi taki a sani disi kan psa.

•   Yonguwan di abi a leeftijd fu 12 yari to go miti 15 yari èn „di e de moro leki 3 yuru langa wan dei tapu social media abi tu tron a kans fu abi problema nanga a gosontu fu den soleki taki den kan kon depressief èn kan kon frede.”

•   Pikin di abi 14 yari èn e de moro furu tapu social media, „no e sribi nofo, trawan e dreigi den tapu social media, den no lobi a fasi fa densrefi de, den no e firi den srefi warti nofo èn den de depressief. Èn den sani disi e pasa moro furu nanga meisje moro leki nanga boi.”

 Fa papa nanga mama kan kibri den pikin gi den ogri sani disi? Bijbel abi rai di kan yepi den.

 Kon sabi san den pikin e du. Leki papa nanga mama, yu musu kon sabi san na den ogri di kan miti yu pikin èn yu musu bosroiti efu yu pikin kan gebroiki social media noso a no musu gebroiki en.

•   Bijbel gronprakseri: „Leri wan boi fu waka a yoisti pasi.”​—Odo 22:6.

•   Ef yu wani kon sabi moro, dan leisi na artikel di nen „Zal ik mijn kind sociale media laten gebruiken?”

 Ef yu bosroiti taki yu pikin kan gebroiki social media, dan yu musu kon sabi san na den ogri sani di kan miti en, èn sabi sortu sani a e du tapu social media. Fa yu kan du dati?

 Kibri yu pikin gi sani di kan du den ogri. Leri yu pikin fu kon sabi san no bun èn leri en fa a kan wai pasi gi dati.

•   Bijbel gronprakseri: „Un no musu taki srefi fu hurudu, noso fu iniwan sani di no krin, noso fu tori di e sori taki unu abi bigi-ai. . . . Un no musu tyari unsrefi na wan syen fasi tu èn un no musu taki lawlawsani noso morsu lafutori.”​—Efeisesma 5:3, 4.

•   Fu kon sabi san yu kan du, leisi na artikel di nen „Hoe leer ik mijn kind om veilig met sociale media om te gaan.”

 Taki o langa a kan gebroiki en. Poti regels oten èn o langa yu pikin mag gebroiki noso de tapu social media.

•   Bijbel gronprakseri: „Waka. . . leki koni sma. Un musu gebroiki a ten fu unu na wan koni fasi.”​—Efeisesma 5:15, 16.

•   Gebroiki a film di nen Luku bun san yu e du te yu de tapu Internet fu yepi yu pikin fu kon ferstan fu san ede a prenspari taki yu e bosroiti omeni ten den mag gebroiki tapu social media.