2023 წანაშ 23 მესის შეერთებულ შტატეფს ჯანდაცვაშ წარმომადგენელეფქ გაფრთხილეს ხალხ თიშ გურშენ, მუნერ გლახათ მოქმედენს სოციალურ ქსელეფ ბრელ ახალგაზრდაშა.

•   „მართალ რე, სოციალურ ქსელეფ შილებე ნამთინე ბაღანაშო ვარდა ახალგაზრდაშო ჯგირ რდას, მარა არგამათ იძირე, ნამდა თიქ, შილებე გლახათ იმოქმედას თინეფიშ ფსიქიკურ დო ფიზიკურ ჯამრთელობაშა“ („სოციალურ მედია დო ახალგაზრდეფიშ მენტალურ ჯამრთელობა“, აშშ-შ მთავარ ქირურგიშ დასკვნა, 2023 წანა).

 მარკვიებელეფქ ენწყეს, მუშენ ოკო მივაქცუათ თე საკითხის დიდ ყურადღება.

•   12—15 წანერ ბაღანეფს, „მით ირდღას 3 საათშე უმოსის მიშახენა სოციალურ ქსელეფს, უმოსო შილებე ფსიქიკურ პრობლემეფქ ქაშუან, თინეფ შქას დეპრესიაქ დო შფოთვით აშლილობაქ“.

•   14 წანერ ბაღანეფს, „მით დიდ დროს უთმენა სოციალურ ქსელეფს, დორულაფაშ პრობლემა უღნა. თინეფ ონლაინ ბულინგიშ მსხვერპლ ხოლო რენა, ფიზიკურო სუსტას გიმიჯინენა, დუდის ურგებელო გინაფლენა დო დეპრესიას ინოლნა. თენა უმოსო ძღაბეფს ოჭირნა, ვინემ ბოშეფს“.

 მუშ კეთება შეულებნა მშობლეფს თე საფრთხეეფშე სქუალეფიშ დაცვებელო? ბიბლია პრაქტიკულ რჩევეფს მარზენა.

 იმოქმედით. მშობლეფ, ყურადღება ქიმიაქცით, მუ საფრთხეეფ მოჸუნს სოციალურ ქსელეფიშ გიმორნაფას დო გეგნოჭყვიდით, ქაღვენუ დო ვარ თქვან სქუას სოციალურ ქსელ.

•   ბიბლიურ პრინციპ: „თეშ მორდჷ სქუა, ნამდა სწორ შარათ გილართას“ (იგავები 22:6).

•   უმოს ინფორმაციაშ მიოღებელო, წეკითხით ჩქინ ვებგვერდის გედვალირ ართ-ართ სტატია „ოკო გიმირინუასო ჩქიმ სქუაქ სოციალურ მედია?“ [ქორთ.].

 თქვან სქუას სოციალურ ქსელეფიშ გიმორნაფაშ ნებას ქიმეჩანთ-და, ყურადღებათ რდათ, ნამდა დეცვათ თი საფრთხეეფშე, მუდგაქ შილებე თიშ გიმორნაფას მაჸუნას დო თინა ხოლო გიჩქუდან, მუჭო ირინუანს თქვან სქუა სოციალურ მედიას. მუჭო შეილებნა თეშ კეთება?

 დოთხილეთ თქვან ბაღანა ზიანიშ მუმაღალარ მასალაშე. ქუდაგურეთ თქვან ბაღანას გეგშეჩინას დო დუდ აურიდას ზიანიშ მუმაღალარ მასალას.

•   ბიბლიურ პრინციპ: „თქვან შქას თეშით ხოლო ოკო ვემიშინუაფდას უზნეობა, მუთუნნერ უწმინდურება დო ჰარამობა ... ვართ საონჯღორო საქციელ, ბორულ ჩიება დო უწმაწურ ციგანობა“ (ეფესოელები 5:3, 4).

•   პრაქტიკულ მოხვარაშ მიოღებელო, წეკითხით ჩქინ ვებგვერდის გედვალირ ართ-ართ სტატია „ქუდაგურეთ სქუალეფს სოციალურ მედიაშ გიმორნაფა“ [ქორთ.].

 დადგინით საზღვრეფ. მაგალთო, წინასწარ დადგინით, მუჟამ დო მუსხი დროს დუთმენს თქვან ბაღანა სოციალურ ქსელეფს.

•   ბიბლიურ პრინციპ: „ჯგირო ქიდეკვირით, ნამდა თეშ ... [იცხოვრათ] მუჭოთ ბრძენეფქ; გონივრულო გეგმირინეთ დრო“ (ეფესოელები 5:15, 16).

•   ბაღანაშა თიშ ეიონწყუმალო, მუშენ რე საჭირო საზღვარეფიშ დადგენა, გეგმირინეთ გრაფიკულ ანიმაცია „ვემშაიტყურუას სოციალურ ქსელქ“.