Leaders for the whole world and different organizations don try make peace dey but them never succeed. Today, serious fight-fight don plenty pass any other time since World War II. Na about two billion people, out of about eight billion people wey dey this world, de live for area wey fight-fight dey.

 Why human being no go fit make peace dey? Wetin Bible talk?

1.  1. The way people de behave de make-am hard for them to even try to make peace dey. Bible don talk say for this our time, “people go de love theirself, go like money too much, go de make mouth, . . . no go de hold people tight, . . . them no go want get any agreement with people, . . . no go de control theirself, them go really wicked, . . . them go de do strong-head, them go de carry body up.”—2 Timothy 3:2-4.

2.  2. No human being or group of people get the power to fit solve their problems, unless the Person Wey Create them, wey be Jehovah a God, help them. Bible help us see say “person wey de waka no fit even direct im step.”—Jeremiah 10:23.

3.  3. Na Satan the Devil, wey get power and wicked de control this world, and na im “de deceive the whole world.” (Revelation 12:9) People go continue to de cause problem and fight war as long as say “na the wicked person de control the whole world.”.—1 John 5:19.

 Bible help us see say na God go make peace dey for this earth, no be human being.

•   “Jehovah talk say: ‘I really know wetin I get for mind for una, na to give una peace, no be problem, to give una hope and correct future.’”—Jeremiah 29:11.

 How God go make that promise happen? ‘The God wey de give peace go destroy Satan.’ (Romans 16:20) God go use one government wey dey heaven, wey Bible de call “the Kingdom of God,” to make peace dey for the whole world. (Luke 4:43) Na when Jesus Christ wey be the King of that Kingdom de rule, people go fit live together in peace.—Isaiah 9:6, 7.

•   To know more, read the article “What Will God’s Kingdom Accomplish?”