“Ṭhalaite zînga rilru lamah harsatna awm hi chinfel nghâl vat a nih loh chuan a hlauhawm thei a—chutianga harsatna a awm chhan ber pakhat chu social media vâng a ni.”—Dr. Vivek Murthy, U.S. surgeon general, New York Times, June 17, 2024.

 Engtin nge nu leh pate’n an fate chu social media hlauhawm laka an vênhim theih ang? Bible chuan thurâwn ṭha tak tak a pe a.

 Hêng Bible thu bulte hi ngaihtuah rawh.

 “Mi remhria erawh chuan a kalna a en ṭha ṭhîn.”—Thufingte 14:15.

 Social media-in i fate chungah nghawng ṭha lo a nei thei tih i hriat avângin maiin, hmantîr maih loh tûr niin inngai kher suh. I fate chu social media hman i phal hmain, hun bituk neia hmang tûr te, ṭhian ṭha nei reng tûr te leh, thil ṭha lote en lo tûr khawpin a puitling tâwk tih chian hmasa ang che.

•   Hriat belh nân, hêng thuziak “Ka Fa Hian Social Media A Hmang Tûr A Ni Em?” tih leh “I Fate Chu Ṭha Taka Social Media Hman Dân Zirtîr Rawh,” tihte hi chhiar rang che.

 “A ṭha thei ang berin in hun hmang ang che u.”—Ephesi 5:16.

 I fate chu social media hmantîr i phal a nih chuan, a hman dân tûrah dânte siamsak la, chung dânte’n a vênhim reng dân tûrte chu hrilhfiah ang che. Social media a hman dânah ṭanpui a ngai tih târ langtu nungchang lama inthlâk danglamna awmte chu hriat tum tlat ang che.

•   Chin tâwk neia hman a ngaih chhan, i fate’n an hriatthiam theih nân, he whiteboard animation Social-Network Hmanna Kawngah Fîmkhur Thiam Rawh tih video hi hmang ang che.

 Bible chuan “hmachhawn harsa êm êm hun khirh” takah kan awm tih a sawi a. (2 Timothea 3:1-5) Chutih rualin, chûng hun khirh takte hmachhawn thei tûra min ṭanpuitu thurâwn ṭha tak takte pawh min pe bawk. He thu ziak ṭhalaite zîngah rilru hrisêlna tihah hian nu leh pate leh an fate tâna Bible ṭanchhan thuziak 20 chuang târ lan a ni.