Dr. Vivek Murthy lele Chirurgien général des États-Unis akate ate: “Hemɔ ya l’ɛtɛ yoka ɛlɔngɔlɔngɔ, yekɔ dui dia wanyandja ndo rɛzo sɔsio wekɔ l’atei w’awui wasala dia hemɔ shɔ monga.”​—New York Times, Ngɔndɔ ka samalo 17, 2024.

 Ngande wakoka ambutshi nkokɛ anawɔ oma lo waale wele la rɛzo sɔsio? Bible mbishaka alako amɔtshi w’ohomba.

 Tɔsɛdingole atɔndɔ wa lo Bible wayela anɛ.

 “Kanga kɛsɔ atokanaka yimba lo ena tshɛ katakolande.”​—Tokedi 14:15.

 Lo menda waale wele la dikambo sɔ, totshutshuyamake dia mbetawɔ di’ɔnayɛ nkamba la rɛzo sɔsio. La ntondo ka wɛ mbetawɔ di’ɔnayɛ nkamba la rɛzo sɔsio, yashikikɛ dia nde aya l’akoka wa ndjadjɛ elelo lo kɛnɛ kendana la wenya, wongelo wa l’angɛnyi w’amɛna ndo mbewɔ awui wa kɔlɔ watanema lɔkɔ.

•   Dia mbeya awui efula, adia asawo wele l’ɛtɛ w’awui ɛnɛ: Mon enfant devrait-il utiliser les réseaux sociaux?” ndo “Protégez votre adolescent des dangers des réseaux sociaux.”

 “Nyokambe la wenya anyu lo yoho yoleki dimɛna.”​—Ɛfɛsɔ 5:16.

 Naka wɛ ambetawɔ di’ɔnayɛ nkamba la rɛzo sosiɔ, kete djɛnde ɛlɛmbɛ wendana la woho wahombande nkamba lawɔ ndo lembetshiyande woho wele ɛlɛmbɛ akɔ nkoka mbokokɛ. Onga la yambalo etena tshɛ katshikitanya ɔnayɛ lɔkɛwɔ, nɛ dia dui sɔ nkoka mɛnya dia ekɔ ohomba mbodjɛ elelo lo kɛnɛ kendana l’okambelo wa la rɛzo sɔsio.

•   Kamba la esangelo wa lo dibaya Onga la yewo lo réseaux sociaux dia nkimanyiya ɔnayɛ dia nde nshihodia lande na kahombande ndjadjɛ elelo ɛmɔtshi.

 Bible mbutaka dia tekɔ lo nsɛna lo “tena dia paa dia wolo mbikikɛ.” (2 Timɔte 3:1-5) L’etena kakɔ kaamɛ, tɔ mbishaka alako wahashile nɛmɔ wakoka tokimanyiya. Listɛ l’asawo ndekana 20 wendana l’ambutshi ndo l’anawɔ koka tanema lo sawo nɛ lo kɛnɛ kendana la yoonge ya lo yimba y’ɛlɔngɔlɔngɔ.