Kisagulo kya ndoba kikukitaga Balongeki ba Yehowa takikusegaga bintu byeingi, kikubezaga tondi na lusumbi lwalemanina Biblia. Ndi bwakulungana kisagulo kisa munda idia * kinalemba kuzinda kwa lusumbi. Mukulinga kwa mulimo wage, Yesu nuwe akundamanine ku kisagulo kya ndoba.​—Yoana 2:1-11.

•  Buni bukutingaga kisagulo kya ndoba?

•  Kuni kukutingyaga Balongeki ba Yehowa bisagulo byabo bya ndoba?

•  Nazi una kundamana kukyo?

•  Ndi kuli muvwalizi wasegwa?

•  Ndi kukukasanagwa nkaso?

•  Ndi bantu bena sambya ma vere zabo ku lutanuno lwa basongana?

•  Ndi basongana benalekelwa mutchele?

•  Ndi kukubezaga kulya nu kunua?

•  Ndi kukubezaga kansambe nu mamina?

•  Ndi Balongeki ba Yehowa bekukitaga kisagulo kyakukengela busi bubakitile ndoba?

 Nkungu za mutali nunse ntu zezo za lusumbi lunakukya dakika 30, lukukitagwa n’umozi wa bakambi bekwigisyaga, ba Balongeki ba Yehowa. Lusumbi lwongo lukulosyaga bukuti bwa nsungu zakasana Biblia ku basongana buno isonga lyabo l’izizye nu kuba na mbogimbogi.​—Baefeso 5:33.

 Guvernema za nsé neingi zikwitabizizyaga bakambi bekwigisyaga ba Balongeki ba Yehowa kwemanina bisagulo bya ndoba. Ukinsa bwigi na kuzinda kwa lusumbi basongana bekukitaga kilumbilo. Nu nawe gabesamba nti abeka munyage lupete ku munwe. Kuzinda wozo mukambi nti abakita leno kuba ba mukazi n’iba.

 Zingo nsé zikukakizyaga ndoba zikitwe tugu mu meiso ma mukulu kishembe wa mbula matali. Nu bubo bukukitwaga mu nkungu neigi lwabusyo lwa kulinga kwa lusumbi. Ndi basongana tabakitile kilumbilo lwabusyo lwa meiso ma mukulu wa mbulamatali, benabukita ku bwigi na kuzinda kwa lusumbi. Ndi babukitile benabukita lingo bulingilingi na bubabukitile ku lwabusyo. Lusumbi lukuzindaga kwa masego makusega mponga ku Kalaga ku kabamba k’isonga ito.

 Ndi bwakulungana, beingi gesamba Balongeki ba Yehowa bekusombolaga kukita kisagulo kyabo kya ndoba mu Numba za Bukota. * Ndi basongana balongekile kisagulo kisa munda idia, nti kyakitwe kungo..

 Mambizi meingi bansania kwisa munda babo beteli Balongeki ba Yehowa bena kundamana, ndi kisagulo kyakitilwe ku Numba za Bukota. Ndi basongana balongekile kisagulo kisa munda idia, bo nt’ubamane bakundamane ku kisagulo kyongo.

 Takuli muvwalizi kishembe ukusegwaga ndi ndoba zakitwa mu Numba za Bukota. Tondo Balongeki ba Yehowa bekwidendekaga kulemba nsungu za Biblia ku kabamba ka muvwalizi, kwa kuvwala nsulu zalosya buno tabeli na mwidosyo nu zatunganana bulingilingi na kikyo kisagulo. (1 Timoteo 2:9) Kwa bulili kanuni zezo u zikukamba kankanka, ku kisagulo kisa munda idia ndi basongana bakilongekile.

 Biblia byatuzegela kukasana kwa kwitundila. (Nimbo 37:21) Balongeki ba Yehowa beku bogelaga-bogelaga kukasana nu kukaswa nkaso mu kisagulo kya ndoba. (Luka 6:38) Tondo, Balongeki ba Yehowa tabekukandaga bantu kubakasa nkaso, lingo tabekutakalelaga meina ma babo babakasile nkaso gesamba bantu. (Matayo 6:3, 4; 2 Bakorinto 9:7; 1 Petro 3:8) Lingo, kukita bubo kuli kukagula milembe za Biblia nu kunyomia bango.

 Kilo. Balongeki ba yehowa tabekukitaga bubo, ku kabamba ka buno bugomya bubo buli na bulingilo bwa kipakano. * Balongeki ba Yehowa bekuswelag’itazi ku basongana mu zingo nzela.

 Kilo. Ku kolokolo kishembe, bantu bekulekelaga mutchele aba bingo bintu ku basongana. Bekubezaga na makengelo ma buno kukita bubo kwakasye basongana kuba na kalamo kalazi nu kasoga. Tondo Balongeki ba Yehowa bekusombaga bugomya bunsania bwa kukua boba muntu aba kintu kishembe. Ukinsa tabekubulanaga, bone shanse.​—Isaya 65:11.

 Mu nkungu za lusumbi lukukitwaga ku Numba za Bukota, idia nu maku tabiku beganizibwaga. Bamozi ku bekusonganaga bekulongekaga kisagulo kin’isa munda idia nu byakunua. (Musambazi 9:7) ndi babula buno maku mabe ku kisagulo kyongo, bekukitaga mpumba zabo insania buno bana tabanue maku nu takube muntu wakwa na bulebi.​—Luka 21:34; Baroma 13:1, 13.

 Ndi basongana balongekile kisagulo k’idia, benalamula buno kube nimbo nu mamina. (Musambazi 3:4) Basombole nimbo bulingilingi na ntundozabo nu bumba bwabo, tondo batitikizye buno nimbo zibasombole zabe nsoga nu kuba tondi na mbaselo nsoga ku bantu bamaninwe. Mambizi meingi kisagulo kikukitwaga ku Numba za Bukota kikubezaga na nimbo zalemanina Biblia.

 Kanuni za biblia tazikuzegela aba kuzugila kukengela busi bwa ndoba, kasi kubukita aba kutabukita kuli bulamuzi bwa n’isonga. Geba ba mukazi n’iba Balongeki ba Yehowa bekukengelaga busi bubakitile ndoba, bekubezaga bo babili, mango gamozi na bikanga nu bilemba byabo.