Mintiʼ in tzaj kyqʼamaʼn testigo de Jehová qa nya bʼaʼn qe vacuna. In kubʼ kyximen qa teyele junjun okslal kbʼel t-ximen qa kʼokel tqʼoʼn vacuna tiʼj moqa miʼn. Ateʼ nim testigo de Jehová o kubʼ kyximen tuʼn tok vacuna kyiʼj.

 In cheʼx testigo de Jehová kyukʼil doctor ex in nok kyqʼoʼn toklen tkyaqilju o tzʼel kynikʼ científico tiʼj tuʼn miʼn ttzajxix yabʼil kyiʼj xjal. In xi kyqʼoʼn chjonte kye xjal in che aqʼunan tuʼn kykanet qʼanbʼil ex mas aj ttzaj jun txʼuʼj yabʼil.

 In nok kyqʼoʼn testigo de Jehová kyoklen kawbʼil in che kubʼ tqʼoʼn gobierno aj ttzaj jun yabʼil. Jun techel, atxix tej ttzaj tzyet COVID-19, o tzaj kyqʼamaʼn tqanil toj nimku yol toj tembʼil te internet lu tuʼntzun tok kyxqʼuqin kyibʼ xjal. O tzaj kyqʼamaʼn qa nim toklen tuʼn t-xi qnimen qe ley o kubʼ tqʼoʼn gobierno tiʼj pandemia ik tzeʼn tuʼn miʼn tok qchmon qibʼ, tuʼn miʼn qok laqʼeʼ kyiʼj txqantl, tuʼn tel qtxʼajoʼn qqʼabʼ, tuʼn tajbʼen mascarilla quʼn moqa alkyexku juntl kawbʼil o tzaj tqʼoʼn gobierno (Romanos 13:1, 2).

 Atxix ojtxe, o tzaj kyqʼamaʼn uʼj o che etz kyuʼn testigo de Jehová qe tqanil lu:

•   Teyele junjun kbʼel t-ximen tiʼ kbʼantel tuʼn aj ttzaj jun yabʼil tiʼj (Gálatas 6:5).

   «Mintiʼ in tzaj tqʼamaʼn revista lu qa mas tbʼanel jun qʼanbʼil twitz juntl ex mintiʼ in tzaj tqʼoʼn xnaqʼtzbʼil kyiʼj qʼanbʼil. Oʼkx in tzaj tqʼamaʼn junjun tqanil ex in xi tqʼoʼn ambʼil kye qeju in che jaw uʼjinte tuʼn tkubʼ kyximen tiʼ kbʼantel kyuʼn» (¡Despertad!, 8 te febrero te 1987).

   «Aya kbʼel ximente qa kʼokel tqʼoʼna vacuna tiʼja ex kyiʼj tkʼwala» (¡Despertad!, 8 te diciembre te 1965).

•   In qo jyone onbʼil kyukʼil doctor tuʼnju in nok qqʼoʼne toklen chwinqlal (Hechos 17:28).

   «In che ajbʼen qʼanbʼil o tzʼel kynikʼ xjal tiʼj kyuʼn testigo de Jehová aj ttzaj jun yabʼil kyiʼj. In nok kyqʼoʼn toklen chwinqlal ex in xi kybʼinchaʼn noq alkyexku tiʼ tuʼn kukx kyanqʼin, pero mintiʼ in che ikʼ tibʼajju in tzaj tqʼamaʼn Tyol Dios» (La Atalaya, 1 te mayo te 1976).

   «Toj tumel qa ma qoʼx tukʼil jun doctor tuʼntzun miʼn ttzaj jun yabʼil qiʼj ex tuʼn kukx qanqʼin. Ax ikx kye testigo de Jehová in che ajbʼen qʼanbʼil kyuʼn. Ex ateʼ junjun in che aqʼunan te doctor ik tzeʼn bʼant tuʼn Lucas, jun okslal aqʼunan te doctor toj tnejel syent abʼqʼi. In nok kyqʼoʼn testigo de Jehová toklen onbʼil in tzaj kyqʼoʼn doctor kye ex in xi kyqʼoʼn chjonte kye tuʼnju kukx in che aqʼunan» (La Atalaya, 1 te febrero te 2011).