Úatu amu garüdia ubouagu to afanreinhóuatu kei Garüdia Awisahatu. Sagü táfuridun aban iseri, imprimíruatu tóugiñe 52 míñunu tídangiñe. Ánheinti ¡Despertad! tárigi tárigiñoun Garüdia Awisahatu lugundun imprimíruatu ani afanreinhóuatu 51 míñunu tídangiñe kada iseri áfuridutu. Gefentiña luagu Heowá adügübarun biángubei garüdia to, ani afanreinha hamutu lidan 236 ageiraü.

Ka gayaraabei wariñaguni tuagu burí amu garüdia? Según lariñawagún tídangiñe óundaruni The Association of Magazine Media, garüdia to tadügüboun aban kónpeni gíritu Association of Retired Persons houn gürigia ha gúnfulihaña lóugiñe 50 irumu, tuguya garüdia alugurúarügütu to wéritimabei tagañeihóun Meriga. Sagü táfuridun aban iseri, alugurúatu tóugiñe 22,400,000 tídangiñe. Ánheinti garüdia yámanina to gíriboun ADAC Motorwelt alugurúatu kéiburi 14 míñunu tídangiñe sagü táfuridun aban iseri, agañeinhóutu giñe 5,400,000 tídangiñe kada iseri garüdia cheini to gíriboun Gushi Hui (aban garüdia to abahüdaguboun luagu dan le sügühalibei).

Anuhein aban periodiku haponna gíritu Yomiuri Shimbun to wéiribei tafanreinhóun. Liibe-agei dan afanreinhóuatu tóugiñe 10 míñunu tídangiñe kada iseri áfuridutu.

Úatu giñe amu agumeiraguagüdüni ubouagu to gíbetimati iñeñein ídounti tásügürawagüda kei to hadügüboun gefentiña luagu Heowá. Anuhein Garüdia Awisahatu lidan lóugiñe 228 iñeñein, adügǘwatu giñe ¡Despertad! lidan lóugiñe 101 iñeñein. Ánheinti garüdia merigana to gíriboun Reader’s Digest (Selecciones lidan chumagü) adügǘwatu lidan 21 iñeñein sagü táfuridun aban ani sánsiti ariñahani le tídanbei según ageiraü le ídanbei tadügǘwa.

Ábaya katei le adügübei lun amu tan Garüdia Awisahatu tuma ¡Despertad! tuéi tíbiri garüdia to wíriduboun guentó lau lan budagia le ichugúbei lau gundaü tamainirúa ani úati awisahani luagu somu ebegidinaü tidan, maguburahóun ligía tuagu.

Imprimíruatu Garüdia Awisahatu mararamagunga lúmagiñe irumu 1879. Tafuranguagüdüni inarüni le tídanbei Bíbülia luágutima Larúeihan Bungiu tisuunibei garüdia to. Ánhounti ¡Despertad! ayanuhatu luagu ámuñegueinarügü katei le uáguti habusenra gürigia hafurendeirun, kéiburi luáguti siensia, hawagu animaalugu, nadü o katei líbeina lira, ayanuha tuguya luagu le lunbei hadügüni gürigia lun hafiñerun luagu Bungiu. Afuranguagüda tumuti giñe ida liña lan lahuudun adundehani le tídanbei Bíbülia woun lidan wabagari.