Idụhe magazine efen emi ẹsuande ke ofụri ererimbot nte Enyọn̄-Ukpeme. Ẹsimịn̄ nsiondi kiet kiet ẹkan miliọn 42. Awake! adiana enye, ẹsinyụn̄ ẹsuan idem miliọn 41 ke nsiondi kiet kiet. Mme Ntiense Jehovah ẹsio magazine mbiba, ẹnyụn̄ ẹsuan enye ke idụt 236.

Ndi ẹsuan mme n̄wed efen ntre? The Association of Magazine Media ọdọhọ AARP, kpa n̄ka emi anamde n̄kpọ ọnọ mme owo emi ẹbede isua 50 ẹsio magazine U.S. emi ọsọn̄de urua akan. Ẹsuan magazine oro ẹbe idem miliọn 22.4. Ẹsuan magazine Germany emi ẹkotde ADAC Motorwelt ẹkpere ndisịm miliọn 14, ndien ẹsimịn̄ eke Chinese emi ẹkotde Gushi Hui (mme mbụk) idem miliọn 5.4.

Ke mme n̄wedmbụk n̄kpọntịbe, eke Japan emi ẹkotde Yomiuri Shimbun ke ẹsuan ẹkan. Se ẹsimịn̄de ẹsikan idem miliọn duop.

N̄wed Mme Ntiense ke ẹkabade ẹkan n̄ko. Ẹkabade Enyọn̄-Ukpeme ke se ibede usem 190, ye Awake! ke se ibede usem 80. Ẹmịn̄ Reader’s Digest ke usem 21, edi idịghe ukem n̄kpọ ke ẹsimịn̄ ẹnọ ẹka kpukpru idụt.

Enyọn̄-Ukpeme ye Awake! itiehe nte mme magazine oro itịn̄de mi. Ẹda ẹnọ imaesịt ẹmịn̄ mmọ, owo isisuanke etop iban̄a enye nte n̄kpọurua, owo inyụn̄ inyamke-nyam enye.

Uduak Enyọn̄-Ukpeme edi ndinam se Bible ekpepde an̄wan̄a, akpan akpan se Bible etịn̄de aban̄a Obio Ubọn̄ Abasi. Ẹketọn̄ọ ndisio enye toto ke 1879. Awake! esineme nsio nsio ibuotikọ, utọ nte n̄kpọ-obot ye ifiọk ntaifiọk, man an̄wam mme owo ẹbuọt idem ye Andibot. Enye etịn̄ n̄ko nte Bible ekemede ndinam ufọn ke uwem nnyịn.